SQO-da jol apatynyń aldyn alý úshin qaýipti ýchaskelerde maketterdiń sany óspek
PETROPAVL. KAZINFORM – Soltústik Qazaqstan oblysynda polıtsııa men jol qyzmetteri trassalardaǵy qaýipsizdik máselelerin talqylap, keńes ótkizdi. Buǵan sońǵy ýaqytta zardaby aýyr jol-kólik oqıǵalarynyń jıileýi sebep bolyp otyr.
SQO polıtsııa departamenti baspasóz qyzmetiniń málimetinshe, qazir avtojoldardyń qysqy kútimin jaqsartý jáne jol qozǵalysy qaýipsizdigin nyǵaıtý mineti tur.
Keńes barysynda «Qazavtojol» AQ óz tarapynan jańa merdigerlerdi tartý jáne tıisinshe joldardy tazartý boıynsha qosymsha tehnıka, oblys úshin satyp alynatyn kóktaıǵaqqa qarsy reagentterdiń kólemin ulǵaıtý týraly sheshim qabyldandy.
Polıtsııa qyzmetkerleri jıynda júrgizýshi tártibin arttyrýdyń mańyzdylyǵyn atap ótti. Avtokólik júrgizýshileriniń keıbiri kóktaıǵaq bolǵan kezde kúrdeli ýchaskelerde jyldamdyqty tómendete bermeıdi. Sondyqtan mundaı qaýipti bólikterdi bannerlermen jaraqtandyrý, tehnıka durys tazalaı almaıtyn aýmaqtarda jyldamdyqty shekteý belgilerin ýaqytsha ornatý usynyldy. Sondaı-aq tártip saqshylary avtokólik patrýlin ımıtatsııalaý úshin qyzyl jáne kókpen jarqyraǵan maıaktardy paıdalanýdy usyndy.
«Tájirıbe kórsetkendeı, bul – jol-kólik oqıǵasynyń aldyn alýdyń tıimdi quraly. Birneshe jyldan beri oblysta jarqyraǵan maıaktary bar patrýldik kólikterdiń 18 jyljymaly maketi qoldanylyp keledi. Olardy qaýipti ýchaskelerge ornattyq, sodan beri bul jerlerde aýyr zardaby bar birde-bir jol-kólik oqıǵasy tirkelmedi. Soltústik Qazaqstannyń kúrt qubylmaly klımat jaǵdaıynda júrgizýshilerdiń nazaryn aýdarý, joldarda aýa-raıyna baılanysty týyndaıtyn problemalar týraly ýaqytyly habardar etý úshin túrli quraldar qajet. Jol apatyn azaıtý – keshendi sheshimderdi qajet etetin mindet, polıtsııanyń múddeli taraptarmen jumysy jalǵasady», - dedi SQO PD ákimshilik polıtsııa basqarmasynyń bastyǵy Serik Áljanov.
