SQO-da jol apatynan zardap shekken beseýdiń ekeýi jansaqtaý bóliminde jatyr

PETROPAVL. KAZINFORM – Soltústik Qazaqstan oblysynda iri jol-kólik oqıǵasynda zardap shekkenderdiń jaǵdaıy belgili boldy.

1 qyrkúıek kúni «Chelıabi-Novosibir» respýblıkalyq mańyzy bar avtojolda jol-kólik oqıǵasy bolyp, eki adam mert boldy. Beseýi túrli dene jaraqatymen emdeý mekemelerine jetkizildi.

SQO Densaýlyq saqtaý basqarmasynyń málimetinshe, zardap shegýshilerdiń eń egde jastaǵysy - 74-te, eń jasy jıyrmadan asqan.

- Bireýi jol-kólik apatynan keıin Mamlıýt aýdandyq aýrýhanasyna jatqyzyldy. Jaǵdaıy ortasha, búgin patsıentti Petropavldaǵy kópbeıindi qalalyq aýrýhanaǵa jetkizý josparlanǵan. Qalǵan tórteýi birden osy qalalyq kópbeıindi aýrýhanaǵa jetkizildi. Ekeýi er adam, ekeýi – áıel. Búgingi tańda 52 jastaǵy er adam men zeınetker áıeldiń jaǵdaıy óte aýyr, turaqsyz, túrli synyq alǵan, jansaqtaý bólimine jatyr. Qalǵandary travmatologııa bólimshesinde, olardyń da jaǵdaıy aýyr dep baǵalanǵan, - deıdi basqarmanyń baspasóz hatshysy Gúlnar Qalıeva.

Esterińizge salaıyq, jol-kólik oqıǵasy keshe túski saǵat 13.30 shamasynda Petropavl-Mamlıýtka baǵytynda boldy.