SQO-da joǵary dene qyzýymen jedel járdem qyzmetine júgingender sany eki ese artty

PETROPAVL. KAZINFORM — Soltústik Qazaqstan oblysynda dene qyzýynyń kóterilýine baılanysty, sonyń ishinde aýyrǵan balalarǵa shaqyrtý kóbeıgen.

Oblystyq jedel medıtsınalyq kómek ortalyǵynyń jyljymaly pedıatrııalyq brıgadanyń dárigeri Sáýlet Esenbek vırýsty ınfektsııanyń belgileri, aýrýmen kúres jáne aldyn alý joldaryn aıtyp berdi. 

Mamannyń aıtýynsha, osal sanat tobyna 5 jasqa deıingi balalar, júkti áıelder, egde adamdar, tynys joldarynyń sozylmaly aýrýlary bar adamdar, júrek-qantamyr júıesiniń aýrýlary bar adamdar jatady.

— Vırýstyq ınfektsııanyń belgilerine keletin bolsaq: dene qyzýynyń birden 39,9 gradýsqa kóterilýi, býyndardyń, bulshyqettiń syrqyrap aýyrýy, kózdiń ashýy, murynnan sý aǵyp, tamaq jybyrlap, qurǵaq jóteldiń paıda bolýy. Ekinshi-úshinshi kúni júrek aınyp, qusý, ish aýyrýy múmkin, — deıdi Sáýlet Esenbek.

Mundaı vırýstyq ınfektsııada balaǵa qalaı kómektesýge bolady? Mamannyń aıtýynsha, aýrýdyń jeńil ótýi úshin barynsha kóp sýsyndardy, onyń ishinde, shyryndar, lımon qosylǵan shaı, sý, kompottardy ishý kerek. 

— Aýyrý bastalǵan alǵashqy 48 saǵatta vırýsqa qarsy preparat — «Oseltamıvır» ishý kerek. Balalarǵa «Flýkap» nemese «Flývır» berý qajet. Temperatýra 38,5-ten asyp ketken jaǵdaıda «paratsetamol» nemese «ıbýfen» berý qajet. «Aspırın», «nımesıl» berýge bolmaıdy. Syrqattyń denesin bólme temperatýrasyndaǵy jyly sýmen súrtý kerek. Mańdaıyna, qoltyq arasyna, shap aımaqtaryna, baýyrdyń tusyna sterıldi maqtadan jasalǵan sýly dáke qoıamyz, — deıdi dáriger.

Mamannyń aıtýynsha, joǵary temperatýranyń bolǵany durys, bul aǵzanyń vırýstarmen kúresip jatqandyǵynyń belgisi. Biraq qyzý túsiretin dárini tek 38,5 gradýstan asqanda ǵana berip, detoksıkatsııa júrgizgen jón. Em der kezinde jáne durys júrgizilgende bala eki apta aýyrmaı, úsh-tórt kúnde táýir bolady.

Aǵzadan toksınderdi shyǵarý úshin S dárýmenin ishken jón. Sondaı-aq suıyqtyqty barynsha kóp ishý kerek, bul toksınderdi shyǵarýǵa kómektesedi.

Antıgıstamındik preparattar iship, muryn men tamaqty jýyp, shaıý kerek. Jartylaı tósektik rejımdi ustanyp, jeńil tamaqtanǵan jón. 

— Qandaı jaǵdaıda jedel járdem qyzmetin shaqyrý kerek? Eger bala enjar, álsirep qalsa, is-áreketinde tejelý baıqalsa, esi kiresili-shyǵasyly bolsa, demalýy qıyndasa, ishi aýyryp, qaıta-qaıta qussa, basy qatty aýyrsa — dáriger kómegine júginý qajet. Sondaı-aq, as ishýden, sý ishýden bas tartsa, balanyń daýsy qarlyǵyp, dene qyzýy turaqty ustalsa, denede ártúrli bórtpeler paıda bolsa, jedel járdem kómegine júginý kerek. Vırýstyq ınfektsııanyń aldyn alý úshin maska taǵyp, gıgıenalyq talaptardy oryndaǵan jón. ıAǵnı qoldy jıi jýyp, bólmeni jıi jeldetip, taza ustaý kerek. Al epıdemııa sharyqtaǵan kezinde kisi kóp shoǵyrlanatyn jerge barmaǵan durys. Taǵy bir tıimdi joly — tumaýǵa qarsy ekpe alý, — deıdi Sáýlet Esenbek.

Buǵan deıin Petropavlda qashyqtan oqýǵa jiberilgen synyptardyń sany artqanyn jazǵan edik.