SQO-da joǵary bilim alǵan 470 stýdenttiń tek 69-y ǵana óńirde qalǵan – aýdıt qorytyndysy
PETROPAVL. KAZINFORM – Soltústik Qazaqstan oblysyna bólingen bıýdjet qarajaty men memleket aktıvterin paıdalaný tıimdiligine memlekettik aýdıt júrgizildi.
SQO boıynsha tekserý komıssııasynyń málimetinshe, oblystyq bilim basqarmasyna júrgizilgen aýdıt nátıjesinde ońtústik óńirlerden kelgen stýdentterdiń aýa raıyna jáne jergilikti mentalıtetke beıimdelýde qıyndyqtarǵa tap bolatyny anyqtaldy. Saldarynan kóptegen túlek oqýyn aıaqtaǵan soń týǵan óńirine qaıta oralyp jatyr.
Atap aıtqanda, júrgizilgen taldaý boıynsha 470 stýdenttiń ishinen tek 69-y ǵana oblysta qalyp, jumysqa ornalasqan. Bul jalpy túlekterdiń nebári 14,7%-y ǵana.
Jastardy aýyldyq jerlerge tartý boıynsha sharalar qolǵa alynǵanymen, kópshiligi aýylda eńbek etýge nıet bildirmeıdi. Buǵan negizinen áleýmettik jaǵdaıdyń jasalmaýy, ınfraqurylymnyń joqtyǵy, motıvatsııalyq tetikterdiń álsizdigi sebep bolyp otyr.
Al Jumyspen qamtýdy úılestirý jáne áleýmettik baǵdarlamalar basqarmasy 2021–2022 jáne 2024 jyldardyń qorytyndysy boıynsha «Qonys aýdarýshylar men qandastardyń jumyspen qamtylý deńgeıi, sonyń ishinde kásipkerlik bastamany damytý» ulttyq jobasynyń nysanaly ındıkatoryn oryndaı almady.
Byltyrǵa bólingen qonys aýdarýshylardy qabyldaý kvotasy da oryndalmaı qalǵan. Oǵan SQO-ǵa óz erkimen qonys aýdarýǵa daıyn azamattardyń joqtyǵy sebep. Jergilikti atqarýshy organdar men basqarma tarapynan ózge óńir turǵyndaryn tartý boıynsha júrgizilgen jumys ta tolyq kólemde iske aspaǵan.
Mamandardyń aıtýynsha, aýdıt kezeńinde oblystan 3852 adam nemese 1212 otbasy kóship ketken. Bul óńirdegi demografııalyq jaǵdaıdy odan ári ýshyqtyrdy.
Buǵan deıin SQO-da áleýmettik osal toptardyń quqyǵyn qorǵaý jónindegi ýákil taǵaıyndalǵanyn jazǵan edik.