SQO-da joǵalǵan er adam úsh kún ormanda tirshilik etken
PETROPAVL. QazAqparat – Soltústik Qazaqstan oblysynda iz-túzsiz joǵalǵan 31 jastaǵy er adam orman ishinen tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, polıtsııa qyzmetkerleri Taıynsha aýdanyndaǵy Dımıtrovka aýylynyń 31 jastaǵy turǵynyn izdep tapty. Er adam din aman. Ol birneshe kún boıy Esil aýdanyndaǵy Torańǵul aýylynyń mańyndaǵy ormanda turǵan.
Er adamnyń joǵalǵandyǵy týraly ótinishti 30 qyrkúıek kúni onyń anasy Taıynsha aýdanynyń polıtsııa bólimine jazǵan. Áıeldiń aıtýynsha, uly 29 qyrkúıek kúni keshke VAZ-21120 avtokóligine otyryp, belgisiz jaqqa ketken.
Іzdeý jumystaryna Taıynsha, Esil, Qyzyljar, sondaı-aq oblystyq polıtsııa apparatynyń qyzmetkerleri tartyldy. Barlyq polıtsııa bólinisterine baǵdarlar jiberildi, sondaı-aq volonterler men iri qoǵamdyq birlestikterdiń ákimshileri áleýmettik jelilerde iz-túzsiz joǵalǵan adamnyń sýretteri men belgileri bar jazbalar ornalastyrdy. Polıtsııa qyzmetkerleriniń, jergilikti turǵyndardyń jáne volonterlerdiń qarqyndy izdestirý jumystary nátıje berdi. Jergilikti turǵyndardyń biri polıtseılerge Torańǵul men Iversk arasyndaǵy jolda qaraýsyz qalǵan VAZ kóligin kórgenin aıtty. Avtokólik iz-tússiz joǵalǵan adamǵa tıesili bolyp shyqty. Polıtsııa qyzmetkerleri aýmaqty túgeldeı sharlady, qyzmettik-izdestirý ıtteri, sondaı-aq kvadrokopter paıdalanyldy.
«Er adam ormannan aman-esen tabyldy. Osy kúnderi, 29 qyrkúıekten 2 qazannyń tańyna deıin ol ormanda bolǵan: shuńqyr qazyp, jerkepe qurastyryp, almamen qorektengen. Er adam týystaryna qaıtaryldy, úıden ketýiniń sebepteri anyqtalyp jatyr», - deıdi krımınaldyq polıtsııa basqarmasynyń bólim bastyǵy Seıilhan Jumaǵulov.
Jyl basynan soltústikqazaqstandyq polıtseıler habar-osharsyz joǵalǵandar boıynsha 323 ótinish qabyldady, onyń 318-i boıynsha búginde izdeýdegiler tabyldy.
