SQO-da joǵalǵan bir otar qoı bes táýlikten keıin shashaý shyqpaı tabyldy
PETROPAVL. QazAqparat – Soltústik Qazaqstan oblysynda joǵalǵan 310 bas qoıdy tártip saqshylary taýyp, aman-esen ıesine tapsyrdy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 11 mamyr kúni Qyzyljar aýdandyq polıtsııa bólimine «Krahmal-Agro» JShS brıgadıri habarlasyp, senbi kúni Shahovskoe aýylynan 10 km jerdegi jaıylymnan 310 bas qoıdyń joǵalǵany týraly aıtady. Oqıǵa ornyna shuǵyl jedel-tergeý toby bardy.
Materıaldardy jınaý barysynda baqtashynyń tústen keıin uıyqtap qalyp, qoıdyń joǵalǵany belgili boldy. Bir otar qoıdy ornynan tappaǵan aýyl turǵyn aldymen ózi izdegen. Tek eki táýlik ótkennen keıin ǵana qoıdyń joǵalǵany týraly basshylyǵyna aıtqan. Kásipker joǵalǵan maldyń qunyn 7 mln 750 myń teńgege baǵalady.
Polıtseıler 310 qoıdy ıisshil ıttermen, kvadrokopterdi paıdalanyp izdedi. Olarǵa áriptesteri - Aqqaıyń, Maǵjan Jumabaev aýdany polıtsııa bólimderiniń jáne «Krahmal-Agro» JShS qyzmetkerleri jáne jaqyn mańdaǵy eldimekenderdiń adamdary kómekke keldi.
Tártip saqshylaryna Aqqaıyń aýdany Grıgorevka eldi mekeni mańynda usaq maldyń izin kórgender habarlasyp, aýylǵa Qyzyljar aýdany polıtsııa bólimi bastyǵynyń orynbasary Arman Jetepovtiń jetekshiligimen jedel-tergeý toby attandy. Nátıjesinde joǵalǵan qoı ormannan tabyldy.
Qoı Shahovskoe aýylynan 50 shaqyrymǵa uzap ketken. Buǵan deıin «Mal urlaý» baby boıynsha qozǵalǵan qylmystyq is qylmys quramynyń bolmaýyna baılanysty toqtatyldy.
