SQO-da joǵalǵan 50 jylqy eki aptadan keıin tabyldy
SQO polıtsııa departamenti baspasóz qyzmetiniń málimetinshe, 12 tamyzda Aqjar aýdanynda úıirden 50 jylqy joǵalǵan. Eki aptaǵa jýyq jylqyshy ulymen birge joǵalǵan maldy ózdiginen tappaq bolyp izdegen. Joǵalǵan jylqynyń ishinde aýyl turǵyndarynyń ǵana emes, óz maly da bolǵan.
24 tamyzda ol aýdandyq polıtsııa bólimine kómekke júgingen. Tártip saqshylary izdeý jáne jedel-izdestirý is-sharalaryna kiristi. Ýaqyt ótýine baılanysty iz kesý múmkin bolmady. Krımnaldyq polıtsııa qyzmetkerleri men ýchaskelik ınspektorlar tóńirekti tekserip, jergilikti turǵyndardan, basqa da baqtashylardan jaýap aldy. Alaıda joǵalǵan jylqylardy kórgen-bilgen adam bolmady.
«Jylqynyń qoldy bolýy boljamyn da qarastyrdyq. Sondyqtan bir mezilde «mal urysy» sanaty boıynsha esepte turǵan aýyldyqtar tekserildi. Olardyń sany Aqjar aýdanynda 23. Eki kúnnen keıin jylqylar ormannan tabyldy, olar jaıylymnan shamamen 50 shaqyrymdaı uzap ketken eken», - deıdi aýdannyń polıtsııa bóliminiń bastyǵy Erkin Mahmetov.
Barlyq jylqy ıelerine aman-esen qaıtaryldy. Aýyl sharýashylyǵy janýarlaryn jaıý qaǵıdalaryn buzǵany úshin baqtashyǵa qatysty QR Ákimshilik quqyq buzýshylyq týraly kodeksiniń 408-baby boıynsha hattama toltyryldy. Ol qaraýyndaǵy úıirdi tórtke bólgen. Osylaısha maldyń basym bóligi erkin jaıylymda baǵylǵan, bul mal urylary úshin qolaıly.
Jalpy jyl basynan Aqjar aýdanynda mal urlyǵynyń 2 faktisi tirkeldi. Eki jaǵdaıda da janýarlar jaıylymnan urlanǵan.
Polıtseıler bos jaıylǵan janýarlardyń eginge zııan keltiretinin nemese jol-kólik oqıǵalaryna sebepshi bolatynyn esten shyǵarmaýdy suraıdy. Bıyl osyǵan baılanysty 4273 soltústikqazaqstandyq jaýapqa tartyldy. Ieleri anyqtalǵanǵa deıin 4005 túlik arnaıy qoraǵa qamaldy.
