SQO-da jylý jáne elektr jelilerin jańǵyrtyp, sapany jaqsartý maqsatynda 12 joba júzege asady

SQO energetıka jáne turǵyn úı-kommýnaldyq sharýashylyǵy basqarmasynyń basshysy Álisher Bespaevtyń aıtýynsha, óńirde jylý jelileri boıynsha 4 joba, al elektr jelileri boıynsha 8 joba qolǵa alynady. Qazir Petropavl qalasynda №2 jylý magıstraliniń qurylysy jalǵasyp jatyr. Bul maqsatqa respýblıkalyq bıýdjetten 3,5 mlrd teńge bólingen.

Sondaı-aq Taıynsha qalasynda, Novoıshımskoe jáne Talshyq aýyldarynda jylý jelileriniń qurylysy bastalǵan. Oblystyq bıýdjetten bul jobalarǵa 764 mln teńge bólindi. Jumys jylytý maýsymy bastalǵanǵa deıin aıaqtalýy tıis.

- Úsh aýdanda elektr jelilerin salýǵa 291 mln teńge bólindi. Sonymen qatar Aqjar jáne Ýálıhanov aýdandarynda rezervtik VL-110 kV elektr jelisin salý jobasy bastaldy. Jobanyń jalpy quny 8,1 mlrd teńge. Bıyl 1,1 mlrd teńgesi bólindi.

Desek te, jylý jelisine qatysty jobalardy aıaqtaýǵa qosymsha 1,7 mlrd teńge, al elektrmen jabdyqtaý jobalaryn tolyq júzege asyrýǵa 1,5 mlrd teńge qajet, - deıdi Álisher Bespaev.

Basqarma basshysynyń aıtýynsha, Ulttyq joba aıasynda osy jyly jylýmen jabdyqtaýǵa qatysty jalpy quny 5,3 mlrd teńge bolatyn bes jobany júzege asyrý josparlanǵan.

Qazirgi ýaqytta óńirde aldaǵy jylytý maýsymyna daıyndyq jumystary bastalyp ketti. Bul maqsatqa barlyq qarjylandyrý kózderinen shamamen 70 mlrd teńge qarastyrylǵan. Bul ótken jylmen salystyrǵanda shamamen 30 mlrd teńgege artyq. Onyń ishinde 26 mlrd teńge - jeke ınvestıtsııalar.

- Jańa jylytý maýsymyna óńirdegi 500-den astam qazandyqty, 542 bilim berý nysanyn, 365 densaýlyq saqtaý mekemesin, 165 mádenıet nysanyn jáne 1449 kópqabatty turǵyn úıdi daıyndaý qajet. Josparlanǵan jumys ýaqytyly oryndalyp, 15 qyrkúıekke deıin daıyndyq pasporttary alynýy tıis. Sonymen qatar jergilikti jerlerde jedel shtabtar qurý kerek. – dedi Álisher Bespaev.

Petropavlda mundaı shtab qurylǵan. Qala ákimi Serik Muhamedıevtiń aıtýynsha, shtabta kommýnaldyq qyzmetterdiń, áleýmettik nysandardyń jáne turǵyn úı qorynyń aldaǵy jylytý maýsymyna daıyndyǵy jáne týyndaǵan máseleler qaralady.

- Petropavlda 1234 kópqabatty turǵyn úı bolsa, sonyń 1188-i ortalyq jylytý júıesine qosylǵan. Bul úılerdiń tek 759-ynda ǵana páter ıeleri kooperatıvi men múlik ıeleri birlestigi bar. 28 turǵyn úı apatty dep tanylǵan, - deıdi Petropavl ákimi.

Buǵan deıin Úkimet Abaı oblysynyń jylý jelilerin jylytý maýsymyna daıyndaýǵa 2,5 mlrd teńge bólgenin jazǵan edik.