SQO-da jylqy súıegine qaqalǵan er adam ólim aýzynan qaldy
PETROPAVL. KAZINFORM – Soltústik Qazaqstan oblysynda keshki asqa jylqy etin jegen er adam, aýrýhanadan bir-aq shyqty.
Petropavl qalalyq kópbeıindi jedel medıtsınalyq járdem aýrýhanasynyń málimetinshe, 66 jastaǵy zeınetker dárigerlerge tósiniń, moınynyń mańy aýyratynyn jáne ózin jaısyz sezinip, júreginiń aınyǵanyna shaǵymdanǵan.
Syrqattyń sózinshe, ol keshke tamaqtanyp otyrǵan kezde jylqy súıeginiń ótkir synyǵyn baıqamaı jutyp qoıǵan. «Ózi ketedi» dep asa mán bermegen er adam, aýyrǵany basylmaǵan soń ýaqytty sozbaı, kómekke júgingen.
Qarap-teksergennen keıin birden dáriger-endoskopıst shuǵyl túrde shaqyrtyldy.
- Súıektiń óte ótkir ekeni jáne onyń óńeshtiń shyryshty qabyǵyna eki jaqtan qadalyp turǵany anyqtaldy. Jergilikti anestezııamen súıekti alyp shyǵý múmkin bolmaǵan soń, syrqatqa ota jasaýǵa sheshim qabyldandy. Jalpy narkozben, tehnıkalyq qıyndyqtarmen bógde zat óńeshten alyndy, - deıdi aýrýhana dárigerleri.
Qazir syrqat hırýrgııa bólimshesinde em alyp jatyr. Jaǵdaıy turaqty bolǵanymen áli de ortasha aýyr.
- Operatsııaǵa deıin ǵana emes, ota kezinde de qaýip boldy. Mundaı jaǵdaılarda endoskopısttiń jumysy asqan dáldikti qajet etedi. Durys emes qımyl óńeshtiń jyrtylyp, qan ketýine ákelýi múmkin. Dárigerdiń tájirıbesi, komandanyń úılesimdi jumysy jáne syrqattyń aýrýhanaǵa der kezinde kelýi – munyń bári otanyń oıdaǵydaı ótýine sebep boldy, - deıdi dárigerler.
Mamandardyń aıtýynsha, eger er adam kómekke júginýdi keıinge qaldyryp, ýaqytty ozdyryp alǵanda, onyń saldary ómirge qaýip tóndirýi múmkin edi. Mundaıda óńesh tesilip, medıastınıt, aýyr ınfektsııa, sepsıske ákeledi.
Sondyqtan tamaqtaný kezinde asyqpaı, tamaqty muqııat shaınaý qajet. Súıekter bolýy múmkin jaǵdaıda ásirese abaı bolý kerek. Aýyrsyný, tamaqta «turyp qalý» sezimi, keýdede nemese moıynda jaısyzdyq bolǵan kezde shuǵyl medıtsınalyq kómekke júgingen jón.
Buǵan deıin Almatyda júkti áıelge bir mezgilde eki ota jasalǵanyn jazǵan edik.