SQO-da jylytý maýsymy bastalǵaly beri 30-ǵa jýyq órt shyqty

PETROPAVL. KAZINFORM – Soltústik Qazaqstan oblysynda bıyl jylytý maýsymy tynysh ótip jatyr. Desek te, peshpen jylytylatyn úılerde órt qaýipsizdigi talaptaryn saqtaý mańyzdy.

a
Foto: Vıdeodan alynǵan skrın

Qys kelisimen jeke turǵyn úılerdegi órt qaýpi de arta túsedi. Peshti durys paıdalanbaý, elektr symdarynyń aqaýy nemese otty abaısyz qoldaný órtke ákelýi múmkin. Sondyqtan qutqarýshylar qys boıy turǵyndar arasynda túsindirý jumystaryn kúsheıtip, qaýiptiń aldyn alýǵa basymdyq beredi. 

SQO Tótenshe jaǵdaılar departamentiniń málimetinshe, jylytý maýsymy bastalǵaly oblys aýmaǵynda 28 órt tirkelgen. Bul ótken jyldyń sáıkes kezeńimen salystyrǵanda eki esege az.

Byltyr osy ýaqytta 56 órt shyǵyp, saldarynan 8 adam kóz jumǵan edi. Bıyl bir turǵyn jaraqat alǵan. Iis tıip ýlaný derekteri tirkelgen joq.

- Bosańsýǵa bolmaıdy. Ótken jylytý maýsymynda oblystyń turǵyn úı sektorynda 214 órt shyǵyp, saldarynan 31 adam mert boldy. Onyń úsheýi - bala, 9 adam jaraqat aldy. Órtten kelgen materıaldyq shyǵyn 52 mln teńgeden asty, - deıdi SQO TJD Memlekettik órt baqylaý basqarmasynyń bastyǵy Aslan Ahmetjanov. 

Mamandardyń aıtýynsha, qys mezgilindegi órtterdiń negizgi sebepteri - peshti ornatý jáne paıdalaný talaptaryn buzý, elektr jabdyqtaryn durys ornatpaý. 

Tótenshe jaǵdaılar departamenti órt pen adam óliminiń aldyn alý úshin jeke sektorda úı-úıdi aralap, reıdter uıymdastyryp jatyr. Іs-sharaǵa prokýratýra, polıtsııa, jergilikti atqarýshy organdardyń qyzmetkerleri jáne volonterler de qatysady. 

Sondaı-aq, órttiń shyǵýyna jol bermeý úshin áleýmettik osal sanattaǵy otbasylarǵa aıryqsha kóńil bólinedi. Departament málimetinshe, oblysta osyndaı 5 357 úı esepke alynǵan. Onda 19 589 adam turady, onyń 10 857-si – bala. Bul úılerdiń birqataryna tegin ıis gazy datchıkteri ornatyldy. 

Buǵan deıin Pavlodar oblysynda órtengen jerlerdiń kólemi 8,5 ese ulǵaıǵanyn jazǵan edik.