SQO-da jylytý maýsymy bastaldy
PETROPAVL. KAZINFORM — Soltústik Qazaqstan oblysynyń keı aýdandary búginnen bastap jylytý maýsymyn bastady.
Máselen, bıyl birinshi bolyp Esil aýdany ortalyqtandyrylǵan jylytý júıesin iske qosty. 26 qyrkúıekte Ǵabıt Músirepov atyndaǵy aýdan, al 28 qyrkúıekten bastap Petropavl qalasy men Jambyl jáne Mamlıýt aýdandary jylytý maýsymyn bastaıdy dep josparlanǵan. Qalǵan aýdandar olardyń qataryna 1 qazannan bastap qosylmaq. Bul týraly ákimdik otyrysynda SQO Energetıka jáne turǵyn úı-kommýnaldyq sharýashylyǵy basqarmasynyń basshysy Álisher Bespaev aıtty. Jalpy oblys boıynsha qazirgi ýaqytta 23 áleýmettik nysanǵa jylý berilgen.
— Oblysta jylý berý maýsymyna daıyndyq jumysy aıaqtalýǵa jaqyn. Óńirde jylýmen jáne elektrmen jabdyqtaý nysandaryn jóndeý, qazandyqtardy ázirleý jáne jylý jelilerin jańartý boıynsha aýqymdy jumystar júrgizildi. Petropavl jylý elektr ortalyǵynda alty qazandyq pen alty týrboagregat kúrdeli jóndeldi. Sonymen qatar josparlanǵan 3,5 shaqyrymnyń ornyna 5,2 shaqyrym jylý jelisi tartyldy. 1273 shaqyrym elektr jelisi jańartylyp, 206 qosalqy stantsııada jóndeý jáne tehnıkalyq daıyndyq jumystary júrgizildi, — dedi Álisher Bespaev.
Aýdandyq qazandyqtardy jylytý maýsymyna daıyndaýǵa bıyl bıýdjetten 19 mln teńgege jýyq qarajat bólindi. Aıyrtaý jáne Ǵabıt Músirepov atyndaǵy aýdandarda eki jańa ortalyq qazandyq paıdalanýǵa berildi. Budan bólek, segiz qazandyq jóndelip, alty jańa qazandyq satyp alyndy. Sondaı-aq 1,5 shaqyrym jylý jelisi qalpyna keltirildi.
Basqarma basshysynyń aıtýynsha, Petropavldaǵy barlyq qajetti jumys osy aptanyń sońyna deıin tolyq aıaqtalady.
Óńirde otyn-kómir qory da jetkilikti. Qazir temirjol tuıyqtarynda 54 myń tonna kómir jatsa, onyń 14 myń tonnasy Petropavlda saqtaýly.
Buǵan deıin Pavlodarda jylytý maýsymy bastalǵanyn jazǵan edik.
