SQO-da 750 myń tonnalyq qýaty bar jem kombınatynyń qurylysy aıaqtalýǵa jaqyn
ASTANA. KAZINFORM — Soltústik Qazaqstan oblysyna jumysy aıasynda Aýyl sharýashylyǵy mınıstri Aıdarbek Saparov negizgi agroóndiristik jobalardyń júzege asyrylý barysymen tanysty, dep habarlaıdy AShM baspasóz qyzmeti.
— Atap aıtqanda, Ǵabıt Músirepov atyndaǵy aýdanda mınıstr «Novoıshımskıı melkombınat» seriktestigine qarasty jem kombınatynyń qurylysynyń tynys-tirshiligimen tanysty. Kásiporyn zamanaýı avtomattandyrylǵan jelilermen jabdyqtalǵan jáne jylyna 750 myń tonna ónim shyǵarýǵa eseptelgen. Jobada syıymdylyǵy 9 myń tonna elevator, tazalaý jáne oraý tsehtary, robottandyrylǵan qoıma qarastyrylǵan. Jobanyń quny — 4,1 mlrd teńge, — delingen habarlamada.
Qazir negizgi jabdyqtar montajdan ótip, iske qosý-qalpyna keltirý jumystary júrgizilip jatyr. Kásiporyndy bıylǵy jyldyń sońyna deıin iske qosý josparlanǵan.
Jobanyń júzege asýy óńirdiń mal sharýashylyǵy kásiporyndaryn sapaly jemmen qamtamasyz etýge, ımportqa táýeldilikti tómendetýge jáne jańa jumys oryndaryn qurýǵa múmkindik beredi.
Sonymen qatar, Aıdarbek Saparov «Býdennoe SK» seriktestigindegi 1 200 bas iri qara malǵa arnalǵan sút-taýarlyq fermanyń qurylysy barysymen tanysty. Jobanyń quny — 9,0 mlrd teńge. Fermanyń jobalyq qýaty — jylyna 10 myń tonna sút óndirýge josparlanǵan.
Qurylys jumystary is júzinde aıaqtaldy. Bıylǵy jyldyń sońyna deıin golshtın-frız tuqymdy 660 bas iri qara mal jetkizý josparlanǵan.
Aıta keteıik, bıyl atalǵan oblysta 14 sút-taýarly fermanyń qurylysy úshin barlyǵy 13,2 mlrd teńge qarjy bólindi.
Budan buryn SQO-da buryn-sońdy asfalt bolmaǵan 51 eldi mekende jol salynǵanyn jazǵan edik.