SQO-da jyl sońyna deıin 64 myń gektar jer memleket menshigine qaıtarylady

PETROPAVL. KAZINFORM - Soltústik Qazaqstan oblysyndaǵy árbir ekinshi gektar aýyl sharýashylyǵy alqaby paıdalanylmaı otyr nemese zań talaptaryna saı resimdelmegen.

Bul týraly «AMANAT» partııasynyń SQOF janyndaǵy «Jer amanaty» óńirlik komıssııasynyń otyrysynda aıtyldy.

2025 jyldyń basynan beri óńirde jalpy kólemi 143,2 myń gektar jer ýchaskesi tekserilip, onyń 76,7 myń gektary paıdalanylmaı jatqany anyqtalǵan. Búginde 35,6 myń gektar memleket menshigine qaıtaryldy, alaıda jyldyq jospardy tolyq oryndaý úshin taǵy 64,4 myń gektardy qaıtarý qajet. Jer resýrstaryn basqarý departamentiniń basshysy Jalǵas Súleımenovtiń aıtýynsha, jerdi maqsatsyz paıdalanýshylarǵa yqpal etýdiń negizgi tetigi – 20 esege ulǵaıylǵan jer salyǵy.

- 2025 jyly júrgizilgen 72 tekseristiń qorytyndysy boıynsha olqylyqty joıýǵa 48 nusqama berildi. 20 esege arttyrylǵan salyq mólsherlemesin qoldaný úshin aqparat Memlekettik kirister departamentine joldanady. 46 ákimshilik jaza qoldanylyp, onyń ishinde 34 aıyppuldyń jalpy somasy 3 mln 534 myń teńge boldy. 7 sharýashylyq nusqamalardan keıin zańbuzýshylyqtardy joıdy, taǵy 4 agroqurylym 2,6 myń gektar jerden erikti túrde bas tartty. Jyl sońyna deıin 100 myń gektar jerdi qaıtarý jospary erikti túrde berý jáne sot sheshimderi arqyly tolyq oryndalmaq, - dedi Jalǵas Súleımenov.

Ýálıhanov aýdanynda memleketke qaıtarylýy tıis 18 myń gektardyń tek 10,6% ǵana júzege asqan. Al 1,5 myń gektar boıynsha quqyqtan aıyrý protsesi júrip jatyr. Aýdan ákiminiń orynbasary Darhan Beısembınniń aıtýynsha, jumys úsh baǵytta qatar júrgiziledi: erikti túrde qaıtarý, tirkelmegen jer telimderin anyqtaý jáne sot arqyly qaıtarý. Degenmen jer telimderiniń kepilde bolýy jáne keıbir jer paıdalanýshylardyń oblystan tys jerde turýy jumysty qıyndatqan – 19,6 myń gektar jerdi ıesiz múlik retinde taný josparlanǵan.

Bıyl májbúrlep qaıtarý aıasynda jalpy aýmaǵy 2,6 myń gektar jer boıynsha eki talap aryz sotqa joldanǵan. Sonyń biri – 2,4 myń gektar jaıylym boıynsha is qanaǵattandyryldy, ekinshi is – 192 gektar jerge qatysty – qaralý ústinde.

Buǵan deıin Shyǵys Qazaqstan oblysynda ınvestor tartý úshin jer máselesi basty kedergilerdiń biri bolyp otyrǵanyn jazǵan edik.