SQO-da jyl basynan beri jarty tonnadan astam esirtki tárkilendi
PETROPAVL. KAZINFORM – Soltústik Qazaqstan oblysynda bıyl zańsyz esirtki aınalymyna qatysty 217 derek tirkeldi.
SQO Polıtsııa departamenti esirtki qylmysyna qarsy is-qımyl basqarmasynyń aǵa jedel ýákili Zarına Popovanyń aıtýynsha, onyń 102-si esirtki zattaryn satýǵa baılanysty, toǵyzy – esirtkini asa iri mólsherde saqtaý boıynsha, 94-i esirtkige qatysty quqyq buzýshylyq bolsa, úsh jaǵdaıda kontrabandanyń joly kesilgen. Budan bólek jedel izdestirý is-sharalarynyń nátıjesinde Aqmola jáne Almaty oblystarynda eki jasyryn esirtki zerthanasy joıyldy.
Zańsyz aınalymnan 512 kg 800 gramm esirtki zaty tárkilendi. Onyń ishinde 9 kg jýyǵy - sıntetıkalyq esirtki.
- Jumysymyzdyń basym baǵyttarynyń biri - esirtki aınalymyn nasıhattaıtyn jáne olardy taratýǵa múddeli ınternet-resýrstardy anyqtaý jáne buǵattaý, quqyq buzýshylardy anyqtap, olardy jaýapkershilikke tartý. Osy jyldyń toǵyz aıynda 1 250 ınternet-silteme buǵattaldy, - deıdi Zarına Popova.
Mamannyń aıtýynsha, «Antıfrod» aqparattyq júıesine zańdy buza paıdalanylǵan qazaqstandyq bank kartalary týraly 642 málimet túsken. Olarǵa qatysty soma shamamen 4 mln teńgeden asqan.
Buǵan deıin Ulytaýda esirtki jarnamasy bar 2 600-den astam ınternet-resýrs buǵattalǵanyn jazǵan edik.
