SQO-da jyl basynan beri 700-ge jýyq sheteldik jaýapqa tartyldy
PETROPAVL. KAZINFORM – Soltústik Qazaqstan oblysynda bıyl 45 sheteldik azamat el aýmaǵynan shyǵaryldy.
SQO Polıtsııa departamenti baspasóz qyzmetiniń málimetinshe, Petropavl turǵyny taksı júrgizýshisiniń dórekiligine shaǵymdandy. Tekserý barysynda polıtseıler júrgizýshiniń Tájikstannyń 42 jastaǵy azamaty ekenin anyqtady. Ol kóshi-qon zańnamasyn buzǵan eken.
Er adam jolaýshylar tasymalymen aınalysqan. Alaıda Qazaqstanǵa kirgen kezde jumys isteıtinin nemese kásipkerlik qyzmetti kórsetpegen. Buǵan qosa, buryn dál osy sebeppen ákimshilik jaýapkershilikke tartylǵan. Tártip saqshylary bir jyl ishinde qaıtalap jasalǵan quqyq buzýshylyq boıynsha materıal jınap, ákimshilik sotqa joldady.
Sot sheshimimen er adamǵa bir táýlik ákimshilik qamaý jazasy taǵaıyndalyp, keıin Qazaqstan Respýblıkasynan bes jyl merzimge shyǵarý belgilendi.
Jyl basynan beri SQO-da 679 sheteldik azamat ákimshilik jaýapkershilikke tartyldy. Onyń 633-i kóshi-qon zańnamasyn buzǵan. 45 sheteldik elden shyǵarylsa, 152-siniń el aýmaǵynda bolý merzimi qysqartyldy.
Buǵan deıin elde shetel azamattaryna turaqty turýǵa ruqsat alý úshin suranysqa ıe mamandyqtar tizimin aıtarlyqtaı keńeıtý josparlanǵanyn jazǵan edik.
