SQO-da jyl basynan beri 52 sheteldik zań buzǵany úshin el aýmaǵynan shyǵaryldy
PETROPAVL. KAZINFORM — Soltústik Qazaqstan oblysynda bıyl kóshi-qon zańnamasyn buzǵany úshin 1236 sheteldik jáne Qazaqstannyń 593 azamaty ákimshilik jaýapkershilikke tartyldy.
SQO Polıtsııa departamenti baspasóz qyzmetiniń málimetinshe, kóshi-qon qyzmetiniń qyzmetkerleri turaqty negizde reıdtik is-sharalar ótkizedi. Tártip saqshylary shetel azamattary bolýy múmkin bazarlardy, dámhanalardy, qurylys nysandaryn jáne basqa da oryndardy tekseredi.
Qoǵamdyq tamaqtaný oryndarynyń birinde Ózbekstan azamaty as úıde de, saýda ornynda da jumys istegeni anyqtaldy. Onyń Qazaqstan Respýblıkasynda eńbek etýge ruqsaty bolmaǵan. Al osynda aspaz bolyp eńbek etken onyń otandasynyń tek jeke tulǵaǵa jumysqa ornalasýǵa quqy bolǵan. Sheteldik azamattar da, olardy jumysqa qabyldaǵan jumys berýshi de ákimshilik jaýapkershilikke tartyldy.
Jyl basynan beri 308 sheteldik zańsyz jumys istegeni úshin, taǵy 85 jumys berýshi sheteldik jumys kúshin zańsyz paıdalanǵany úshin jaýapqa tartyldy. Sot sheshimimen 52 sheteldik Qazaqstan Respýblıkasynan tysqary shyǵaryldy.
Buǵan deıin kabınetin sheteldik jumysshylarǵa jóndetti dep aıyptalǵan polıtsııa qyzmetkeri kinásin moıyndamaǵanyn jazǵan edik.
