SQO-da jyl basynan beri 35 adam Qazaqstan azamattyǵyn aldy
PETROPAVL. KAZINFORM – Soltústik Qazaqstan oblysynda kóshi-qon qyzmeti byltyr 64 myńnan astam azamatqa pasport pen jeke kýálik rásimdegen.
SQO Polıtsııa departamenti kóshi-qon qyzmeti basqarmasynyń bastyǵy Ermek Nusurbaevtyń aıtýynsha, qazirgi ýaqytta basqarmada 11 qyzmetker bar. Olardyń mindeti — kóshi-qondy baqylaýdy qamtamasyz etip, halyqqa kúndelikti qyzmet kórsetý. Sonyń ishinde jeke basty kýálandyratyn qujatty rásimdeý, sheteldikterge el aýmaǵynda ýaqytsha jáne turaqty turýǵa, sondaı-aq Qazaqstan Respýblıkasynan tys jerlerge turaqty turýǵa shyǵýǵa ruqsat berý — suranysqa ıe qyzmetter.
— Byltyr kóshi-qon qyzmeti 24 myńnan astam azamatty QR azamatynyń pasportymen jáne 40 myńǵa jýyq adamy jeke kýálikpen qujattandyrǵan. Qazr azamattardyń qalaýy boıynsha qujattardy jedeldetilgen tártippen rásimdeý múmkindigi bar. Qazir jeke basty kýálandyratyn qujatty tirkelgen ornyna qaramastan kez kelgen halyqqa qyzmet kórsetý ortalyǵynda rásimdeýge bolady. Mysaly azamat basqa qalaǵa baryp, jeke kýáligin joǵaltyp alsa, sondaǵy HQKO-ǵa baryp, jańasyna tapsyrys bere alady. Qujat úsh kúnde, al respýblıkalyq mańyzy bar qalalarda bir kúnde ázirlenedi, — deıdi Ermek Nusurbaev.
Qazirgi ýaqytta SQO aýmaǵynda 1477 sheteldik ýaqytsha jáne 6873 adam turaqty turýǵa tirkelgen. Bıyl QR azamattyǵyn 35 adam aldy. Ótken jyly 55 tulǵaǵa Qazaqstan azamattyǵy berildi. Olar negizinen TMD elderinen kelgender.
— Shetel azamattaryna Qazaqstan Respýblıkasynyń aýmaǵynda ýaqytsha turýǵa ruqsat berý boıynsha byltyr 6600 elektrondy qyzmet kórsetildi. Shetel azamattaryna el aýmaǵynda turaqty turýǵa ruqsat berý boıynsha 416 memlekettik qyzmet berildi. Onyń 360-y — TMD elderi azamattaryna, 56-sy alys shetel azamattaryna kórsetildi. Al óńirden 271 otbasy basqa elge turaqty turýǵa kóship ketti, — deıdi Ermek Nusurbaev.
Basqarma bastyǵynyń aıtýynsha, sheteldikter tarapynan eń jıi jasalatyn zań buzýshylyq — Qazaqstan aýmaǵynda bolý merzimin buzý. Byltyr kóshi-qon zańnamasyn buzǵany úshin 1,5 myńnan astam sheteldik ákimshilik jaýapkershilikke tartylǵan. Al quqyq buzýshylyq qaıtalanǵan jaǵdaıda olarǵa sot sheshimimen 5 jylǵa deıin Qazaqstan aýmaǵyna kirýge tyıym salynady.
Buǵan deıin Petropavl ákimdigi tasqyn kezinde zardap shekkenderdi tamaqtandyrǵan kásipkerge 29 mln teńge qaryz bolǵanyn jazǵan edik.