SQO-da jyl basynan beri 270 esirtki siltemesi buǵattaldy
PETROPAVL. KAZINFORM — Petropavlda blogerler men eriktiler polıtseılermen birge esirtki jarnamasy bar graffıtılerdi boıap, joıýǵa kómektesti.
Soltústik Qazaqstan oblystyq polıtsııa departamenti baspasóz qyzmetiniń málimetine súıensek, 18 naýryz kúni Petropavlda esirtkini jarnamalaý men nasıhattaýǵa qarsy aýqymdy aktsııa ótti.
Tártip saqshylary men qalalyq ákimdik janyndaǵy Jastar resýrstyq ortalyǵynyń belsendileri Petropavldyń adam az júretin aýdandaryn aralady. Bul jerlerde áli de esirtki satatyn ınternet-dúkenderdiń siltemeleri bar jazbalar kezdesedi.
— Esirtki bıznesimen kúres tek kóshelerde ǵana emes, ınternet keńistiginde de belsendi júrgizilip keledi. Aqparattyq jumys únemi júrgiziledi. Esirtki qylmysyna qarsy is-qımyl basqarmasynyń Instagram jelisindegi paraqshasy 1 mln qaralym jınady, — deıdi polıtseıler.
Budan bólek, jyl basynan beri sıntetıkalyq esirtkilerdi satýǵa qatysty aqparat taratqan 270 ınternet-silteme anyqtalyp, buǵattaldy.
Al qańtar aıynan beri SQO polıtseıleri Qostanaıdan, Astanadan jáne Aqmola oblysynan jetkizilgen sıntetıkalyq esirtkiniń 7 arnasynyń jolyn toqtatyp, eki iri narkolaboratorııany joıǵan.
Buǵan deıin SQO-da jyl basynan beri esirtkige qatysty 40-qa jýyq derek tirkelgenin jazǵan edik.