SQO-da jyl basynan beri 260 adam skarlatına juqtyrǵan
PETROPAVL. KAZINFORM — Soltústik Qazaqstan oblysynda skarlatına aýrýyn juqtyrǵandar sany 30% tómendedi. Jiti ınfektsııalyq aýrýmen kóbine balalar aýyrady.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde aýyrǵandar sany azaıǵanymen, jyl basynan beri 261 adamǵa skarlatına dıagnozy qoıylǵan.
«Skarlatına — bul ıntoksıkatsııa belgileri — bas aýrýy, dene qyzýynyń kóterilýi, álsizdikpen qatar, badamsha bezderdiń qabynýymen jáne teriniń bórtpesimen qatar júretin joǵarǵy tynys joldarynyń jiti ınfektsııalyq aýrýy. Bul dertti adamdardyń kópshiligi balalyq shaqta juqtyrady. Aýrýdan keıin ómir boıyna turaqty ımmýnıtet qalyptasady. Skarlatınaǵa qarsy ekpe qarastyrylmaǵan», — deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.
Mamannyń aıtýynsha, ınfektsııa aýrý adamnan aýa arqyly juǵady. Mektep jasyna deıingi jáne mektep jasyndaǵy, ıaǵnı 2 jastan 8 jasqa deıingi balalar jıi aýyrady. Óıtkeni olar streptokokkqa óte sezimtal keledi. Adam aýyrǵannan keıin ınfektsııanyń tasymaldaýshysy bolady jáne ony juqtyrǵan sátten bastap odan keıingi 3 apta boıy basqa adamdarǵa juqtyra alady.
«Aýrýdyń alǵashqy belgileri streptokokk ınfektsııasyn juqtyrǵannan keıin 2-7 kún ótken soń paıda bolady. Aldymen temperatýra 39-40°C deıin kóteriledi, sodan keıin álsizdik, bas aýrýy paıda bolady, keıde aýyrǵan adamnyń júregi aınyp, qusady. Jutyný kezinde aýyrsyný seziledi, badamsha bezderi úlkeıip, ústinde surǵylt jabyn bolady. Skarlatınanyń aldyn alý úshin jeke gıgıenany saqtaý kerek. Balalardy qoldy únemi jýýǵa, aýyz qýysyn kútýge úıretý kerek. Jeke súlgisi, tis şetkasy, bótelkesi bolýy tıis. Osy qarapaıym sharalardyń barlyǵy streptokokk ınfektsııasynyń taralý qaýpin aıtarlyqtaı tómendetedi», — deıdi Arman Kúshbasov.
Sondaı-aq maman juqpaly ınfektsııadan saqtaný úshin adamdar kóp jınalatyn oryndarǵa barmaýǵa, úı-bólmeni jıi jýyp, jeldetýge keńes beredi. JRVI belgileri bar adamdarmen baılanysty shekteý, aýrý belgileri paıda bolǵan kezde ózin-ózi emdeýmen aınalyspaý jáne dárigerdi úıge shaqyrý — oryndalýy tıis sharttar.
Buǵan deıin SQO-da bir aı ishinde 10,3 myń adam JRVI-men aýyrǵandyǵyn jazǵan edik.
