SQO-da jıdek tergen áıeldi atqan ańshyǵa qatysty sot úkimi shyqty

PETROPAVL. QazAqparat – Soltústik Qazaqstan oblysynda jıdek terip júrgen áıeldi elikpen shatastyryp, abaısyzda atyp óltirgen Sergeı Losenıaǵa qatysty sot úkimi shyqty, dep habarlaıdy QazAqparat tilshisi.

Mamlıýt aýdandyq sotynyń málimetinshe, vedomstvo qylmystyq isti QK 104-babynyń 1-bóligi, 287-bóligi 3-bóligi, ıaǵnı abaısyzda óltirý jáne atys qarýy men oq-dárilerdi zańsyz satyp alý, saqtaý, tasymaldaý, alyp júrý boıynsha qarady.

Er adam optıkalyq kózdeýishi bar ıir oıyqty sporttyq-ańshylyq qarýdy jáne 5,6 mm kalıbrli patrondardy zańsyz satyp alyp, úıinde saqtap kelgen.

2022 jyldyń 11 maýsymynda ol aýyl arasyndaǵy jolmen Jambyl aýdany Baýman stansasyna barmaq bolady. Jolda bıdaı alqabynda júrgen áıeldi elik dep qalyp, ony qolyndaǵy myltyǵymen atady. Saldarynan áıel ıyǵynan jaralanyp, keıin sol jaraqatynan qaıtys boldy.

Sottalýshynyń kinásin kýágerler de rastady, jınalǵan materıaldar arqyly da tolyq dáleldendi.

Prokýror er adamdy 4 jylǵa bas bostandyǵynan aıyrýdy surady. Zardap shegýshiler de bul jazamen kelisti.

Sottalýshy qylmys jasaǵanyn moıyndady.

Sot úkim shyǵararda onyń shyn júrekten ókinish bildirýin jáne qylmysty spırttik ishimdik iship jasaǵanyn esepke aldy. Nátıjesinde barlyǵyn eskere otyra er adamdy 3 jylǵa bas bostandyǵynan aıyrdy. Ol jazasyn qylmystyq-atqarý júıesiniń ortasha qaýipsizdik mekemesinde atqarady.

Sondaı-aq zardap shekken tarapqa 3 mln teńge moraldyq shyǵynnyń ornyn toltyrdy.

Sottyń úkimi áli zańdy kúshine engen joq.

Esterińizge salaıyq, Sergeı Losenıa ań aýlaýǵa shyǵyp, 49 jastaǵy Altynaı Muzdaqpaevany abaısyzda atyp alǵan edi. 65 jastaǵy er adam jıdek terip júrgen áıeldi ańmen shatastyryp alǵan. Keıin osy oqıǵaǵa qatysty polıtsııanyń ýchaskelik ınspektory da qamaýǵa alyndy.