SQO-da jezókshelikpen aınalysqan úsh jigit esepke alyndy
PETROPAVL. QazAqparat – Soltústik Qazaqstan oblysynda «Stop-trafık» operatsııasy aıasynda jezókshelikpen aınalysqan 5 adam esepke alynsa, sonyń úsheýi – er adam, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, «Stop-trafık» operatsııasy barysynda krımınaldyq polıtsııa qyzmetkerleri men «Áıelderge qoldaý kórsetý ortalyǵynyń» ókilderi halyqqa medıtsınalyq maskalar taratty. Onda «Adam – taýar emes!», «Quldyqqa kelispeńiz!», «Óz ómirińizdi tańdaýǵa quqyǵyńyz bar!» degen jazýlary bar. Sondaı-aq tegin quqyqtyq kómek kórsetetin qaýyrt jeliniń «116 16» telefon nómiri jazylǵan býkletter taratyldy.
«Bul – arnaıy operatsııa aıasynda júrgizilgen jumystyń bir baǵyty ǵana. Budan bólek tártip saqshylary osy saladaǵy quqyq buzýshylyqtardy anyqtaýǵa, onyń aldyn alýǵa jumyldyrylyp, jaǵdaıdyń týýyna ne sebep bolǵanyna taldaý jasaıdy. Kóshi-qon qyzmeti men ýchaskelik polıtsııa qyzmetkerleriniń kómegimen zańsyz túrde jumysqa jegilgen adamdardy anyqtaý maqsatynda qurylys alańdary, sharýashylyqtar tekseriledi. Al jynystyq paıdalanýǵa jol bermeý jáne jezókshelikpen aınalysýǵa jaǵdaı jasap otyrǵandardy anyqtaý úshin kóńil kóterý oryndary, monshalar men saýnalar, meımanhanalar tekseriledi», - deıdi SQO PD Krımınaldyq polıtsııa basqarmasynyń bastyǵy Petr Klımov.
Basqarma basshysynyń aıtýynsha, jyl basynan jeńgetaılyqtyń 5 jáne adamdy bostandyǵynan zańsyz aıyrýdyń 1 faktisi anyqtalǵan. Jezókshelikpen aınalysýǵa ǵımarat berýdiń 3 faktisi tirkeldi.
Tek sońǵy eki táýlikte ǵana jezókshelikpen aınalysqan 5 adam esepke alyndy. Olardyń úsheýi – er adam. Tánin satýdy kásip etken jigitterdiń jasy 27 men 34 aralyǵynda.
