SQO-da jeti jasar bala sýǵa batyp ketti
PETROPAVL. QazAqparat - Soltústik Qazaqstan oblysynda Esil ózenine batyp ketken jeti jasar balanyń denesi tabylmaı jatyr, dep habarlaıdy QazAqparat tilshisi.
Qaıǵyly oqıǵa senbi kúni keshki 5-ter shamasynda Qyzyljar aýdanynyń Novonıkolskoe aýylynda bolǵan. Іshki ister departamentiniń baspasóz qyzmetiniń málimetinshe, qaza tapqan bala sýǵa qulamas buryn kópirdiń ústinde turǵan.
«Balanyń janynda ata-anasy bolǵan joq. Kópirge baryp, sonda oınaǵan, aıaǵy taıyp ketken bolýy kerek. Jaqyn mańda taǵy bir bala balyq aýlap júrip, oqıǵaǵa kýá bolǵan. Onyń aıtýynsha, aǵyny qatty ózen balany birden aǵyzyp áketken. Balanyń máıiti áli de izdestirilýde. Arnaıy toptar jumys jasaýda, súńgýirler aǵystan tómen 2,5 shaqyrym jerden izdestirý jumystaryn júrgizýde. Sýdyń laılyǵy, eshteńeniń kórinbeýi, ózendegi bóreneler men sý ústindegi butaqtar, sondaı-aq, aǵystyń qatty bolýy izdestirý jumystaryna kedergi keltirýde», - delingen habarlamada.
Áleýmettik jelilerde turǵyndar eriktilerdi balanyń denesin izdestirýge at salysýǵa shaqyrdy.
