SQO-da jeti kópbalaly ana praımerızge qatysýǵa tilek bildirdi

PETROPAVL. QazAqparat – Soltústik Qazaqstan oblysynda praımerızge qatysýǵa 400-den astam adam tilek bildirse, sonyń jartysyna jýyǵy - áıelder, dep habarlaıdy QazAqparat tilshisi.

«Nur Otan» partııasy SQOF tóraǵasynyń birinshi orynbasary Ásem Rahmetovanyń aıtýynsha, búginge deıin 405 adam ótinish berip úlgerdi, onyń 173-i - áıelder. Arasynda 7 kópbalaly ana da bar.

«Úmitkerlerdiń ortasha jasy – 35 pen 50 shamasynda, olardyń úlesi 46% quraıdy. Al 24% - 35 jasqa deıingiler. Praımerızge qatysýǵa nıettengenderdiń 49% - bilim salasynyń qyzmetkerleri, 12% - shaǵyn jáne orta bıznes ókilderi. Sondaı-aq, sport, mádenıet, densaýlyq saqtaý, aýyl sharýashylyǵy salalarynyń ókilderi de bar», - deıdi Ásem Rahmetova.

Qoǵam belsendisi, Petropavldaǵy morj klýbynyń múshesi, ári negizin qalaýshy Erik Maǵambetov «Nur Otan» partııasynan qalalyq máslıhattyń depýtaty bolǵysy keledi. Ol alǵashqylardyń biri bolyp praımerızge qatysýǵa ótinish berdi.

Erik Maǵambetov «Jasyl el» jastar eńbek jasaǵynyń oblystyq shtabyn basqardy. Elde tótenshe jaǵdaı jarııalanǵan kezde ol volonterlikke bet burdy. Morj klýbynyń basqa múshelerimen birge qarajat jınap, 70-ke jýyq otbasyna azyq-túlikpen kómektesti.

M.Jumabaev aýdandyq ortalyq aýrýhanasynyń bas dárigeri Sáken Ámrın «Nur Otan» partııasynyń kadrlyq rezervinde tur. Ol da kandıdatýrasyn usyndy.

«Bizdiń bastaýysh partııa uıymynyń negizgi qundylyǵy – adamdar. Quramynda 12 dáriger bar. Olar densaýlyq saqtaý salasynda uzaq ýaqyt jumys istep keledi. Partııanyń qandaı bastamalary bolmasyn qoldaý kórsetýge ázir. Bizdiń partııalyqtar halyqty «Elektrondy kezek», «SKOmed» baǵdarlamalarymen jumys isteýge úıretýge bastama kóterdi. Bul joba bastaýysh partııa uıymynyń negizinde eki jyldan beri jumys istep keledi», - deıdi Sáken Ámrın.

Praımerızge qatysýshylardyń úgit-nasıhat jumystary 7 qyrkúıekte bastalyp, 3 qazan kúni aıaqtalady. Ony kandıdattar óz qarajatyna júrgizedi.

Sondaı-aq olar debatqa qatysýǵa mindetti. Qalalyq, aýdandyq máslıhat depýtattyǵyna úmitkerler bir debatqa qatyssa, oblystyq máslıhatqa kandıdattar – eki, al Májilis depýtattyǵyna nıet bildirgender - úsh jaryssózge qatysýy tıis.

Daýys berý 1-3 qazan aralyǵynda onlaın ótedi. Al qaǵaz bıýlletenmen 3 qazan daýys berýge bolady.