SQO-da jerinen aıyrylǵan kásipkerdiń quqyǵy qorǵaldy

PETROPAVL. QazAqparat – Soltústik Qazaqstan oblysynda aýyl sharýashylyǵy taýaryn óndirýshi memleket muqtajy úshin odan májbúrli túrde alynǵan jer ýchaskesin qaıtaryp aldy, dep habarlaıdy QazAqparat tilshisi.

SQO Sybaılas jemqorlyqqa qarsy qyzmettiń málimetinshe, Esil aýdanynyń ákimdigi Petrovka aýyly turǵyndaryn aýlasyndaǵy jekemenshik malyn jaıý úshin jaıylymdyq jerlermen qamtamasyz etpek bolǵan.

Sol úshin jergilikti agrarııden aýdany 290 ga jer ýchaskesin alyp qoıý týraly qaýly shyǵarǵan.

Ótken jyldyń sońynda Petrovka aýyly turǵyndarynyń qatysýymen jıyn ótip, onda jaıylymdar men shabyndyq alqaptardyń jetispeýshiligi máselesi qaralǵan.

Jergilikti bılik aýyldyq okrýg turǵyndary jıynynyń hattamasyn negizge alyp, qaýly shyǵarǵan.

Alaıda, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańnyń normalaryna sáıkes, jer ýchaskelerin alyp qoıý nemese jer ýchaskesin jalǵa alý merzimin toqtatý týraly máseleni qaraý jergilikti qoǵamdastyq jıyndaryna bekitilmegen.

Kásipker óz quqyǵyn qorǵaý úshin SQO kásipkerler palatasyna júgindi.

Onda QR Sybaılas jemqorlyqqa qarsy is-qımyl agenttiginiń oblystyq departamentimen birlesip sot organdaryna talap aryz daıyndaý boıynsha konsýltatıvtik kómek kórsetildi.

Alaıda Esil aýdanynyń ákimdigi SQO mamandandyrylǵan aýdanaralyq ákimshilik sotynyń sheshimi shyqqanǵa deıin aldyn ala áreket etip, jer ýchaskesin májbúrlep ıelikten shyǵarýdy bastaý týraly qaýlynyń kúshin joıdy.