SQO-da jer ýchaskesin zańsyz bergeni úshin jer komıssııasynyń músheleri jazalandy
ASTANA. KAZINFORM — Soltústik Qazaqstan oblysynyń mamandandyrylǵan tabıǵat qorǵaý prokýratýrasy sý qoımasy «ıÝrtovoe» kóli ornalasqan jer ýchaskesin berý kezinde zańnamanyń buzylǵanyn anyqtady. Bul týraly Soltústik Qazaqstan oblysy prokýratýrasynyń baspasóz qyzmeti habarlady.
— 2023 jyly aýdany 55 ga ýchaske orman ósirýge arnalǵan maqsatta paıdalanýǵa berilgen. Alaıda, bul sheshim Jer kodeksiniń 26-babynyń jáne «Jaıylymdar týraly» zańnyń 14-tarmaǵynyń talaptaryna qaıshy keledi, óıtkeni aýmaq jeke aýlanyń aýyl sharýashylyǵy janýarlaryn jaıýǵa arnalǵan jaıylymdyq jerge jatady. Sonymen qatar, 55 ga jerdiń 40 ga sý qoımasy alyp jatyr, bul ony sý qorynyń bóligi etip otyr. Jer kodeksiniń 135-babynyń jáne Sý kodeksiniń 119-babynyń talaptaryna sáıkes mundaı jerlerdi orman ósirý úshin berý osy jaǵdaıda bolmaǵan sý resýrstaryn qorǵaý salasyndaǵy ýákiletti organnyń oń qorytyndysy bolǵan kezde ǵana múmkin bolady, — delingen habarlamada.
Aıqyn zań buzýǵa qaramastan, jer komıssııasy ýchaskeni jeke tulǵaǵa jalǵa berý týraly oń qorytyndy shyǵarǵan. Alaıda, prokýratýranyń aralasýynan keıin sot jerdi berýdi zańsyz dep taýyp, kóli bar ýchaskesin memleket menshigine qaıtarý týraly sheshim qabyldady. Onyń kadastrlyq quny 117 mln teńgeden asady.
— Prokýrorlyq qadaǵalaý aktisi memlekettik qyzmet isteri agenttiginiń SQO boıynsha departamentiniń Ádep jónindegi keńesinde qaraldy. Nátıjesinde jer komıssııasynyń músheleri, sondaı-aq jer qatynastary jónindegi bólimderdiń jáne Mamlıýt aýdany ákimdiginiń memlekettik quqyqtyq bóliminiń basshylary qyzmetke tolyq sáıkes emes túrinde tártiptik jaýapkershilikke tartyldy, — delingen prokýratýra habarlamasynda.
Mamandandyrylǵan tabıǵat qorǵaý prokýratýrasy qorshaǵan ortany qorǵaý jáne sý obektilerin berý salasyndaǵy zańnamanyń saqtalýyn qadaǵalaýdy jalǵastyryp jatyr.
Aıta ketelik jyl basynan beri qaıtyrylýy tıis 2 mln gektar jerdiń 460,6 myńy qaıtaryldy.