SQO-da Jeńistiń 75 jyldyǵyna oraı maıdangerlerge 300 myń teńgeden beriledi

PETROPAVL. QazAqparat – Soltústik Qazaqstan oblysynda Jeńistiń 75 jyldyq mereıtoıyna oraı Ekinshi Dúnıejúzilik soǵysqa qatysqan ardagerlerge bir rettik tólem – 300 myń teńgeden berilmek, dep habarlaıdy QazAqparat tilshisi.

SQO-da qazirgi ýaqytta Ekinshi Dúnıejúzilik soǵystyń 68 ardageri bar. Jeńistiń 75 jyldyǵyn joǵary deńgeıde atap ótý úshin uıymdastyrylatyn is-sharalar jospary bekitilip jatyr. Túrli merekelik, qaıyrymdylyq aktsııalar ótkizilmek. Maıdangerler Máskeýde jáne Nur-Sultan qalasynda ótetin Jeńis paradtaryna qatysady dep josparlanǵan.

«Jeńistiń 75 jyldyq mereıtoıyna oraı maıdangerlerge bir rettik tólem – 300 myń teńgeden beriledi. Byltyr onyń mólsheri 252 myń teńge bolǵan. Uly Otan soǵysy ardagerlerine teńestirilgenderge 100 myń teńgege deıin tólenedi. Olardyń sany – 603 adam. Buǵan deıin 12,6 myń teńge berilgen bolatyn. Tyl eńbekkerlerine – 6 781 adamǵa 30 myń teńgeden tólem jasalady», - deıdi SQO ákiminiń orynbasary Asqar Saqypkereev.

Onyń sózine qaraǵanda, jaqynda «QR ardagerleri týraly» Zań qabyldanbaq. Bul zańda soǵys ardagerleri men olarǵa teńestirilgen jandarǵa kórestiletin jeńildikter tizimi ulǵaımaq. Sondaı-aq «eńbek ardageri» uǵymy engiziledi. Zańda olarǵa tıisti jeńildikter, áleýmettik kepildeme men mártebeni belgileý jáne ardager kýáligin berý mehanızmi kórsetiledi.

Mamandardyń esebinshe. Qazir oblysta 139,5 myń adam zeınetaqy men járdemaqy alady. Bıyl olarǵa 125,9 mlrd teńge tólem jasalǵan.