SQO-da Jeńis merekesin bıyl 52 ardager qarsy alady

PETROPAVL. QazAqparat – Soltústik Qazaqstan oblysynda Jeńistiń 75 jyldyq mereıtoıyna oraı soǵys ardagerleri men tyl eńbekkerlerine birrettik materıaldyq kómek kórsetildi, dep habarlaıdy QazAqparat tilshisi.

Bıyl SQO-da Ekinshi dúnıejúzilik soǵystaǵy Jeńis merekesin nebári 52 ardager qarsy alady. Olardyń 36-sy – Petropavl turǵyndary. Mereıtoıǵa oraı maıdangerlerdiń árqaısysyna 1 mln teńgeden qarjylaı kómek kórsetildi.

«Soǵys ardagerleriniń eń jasy búginde 94-95-ke kelgen aqsaqaldar. Ókinishke qaraı, olardyń qatary jyldan-jylǵa azaıyp barady. Úkimetimiz bul kisilerge qamqorlyqty kóbeıtpese, azaıtyp otyrǵan joq. Bıyl árqaısysy 1 mln teńgeden aldy. Prezıdenttiń Jarlyǵyna oraı 9 Mamyr qarsańynda ár ardagerge mereıtoılyq medaldi saltanatty túrde tapsyramyz», - deıdi SQO Ardagerler keńesiniń tóraǵasy Eskendir Eleýsizov.

Qan maıdanǵa baryp qarý asynbasa da, elde otyryp erlikke para-par is atqarǵan, ıaǵnı soǵysqa qajettiniń bárin jetkizip turǵan tyl eńbekkerleri de umyt qalmady. Bıyl óńirde tylda eńbek etken jandarǵa 30 myń teńgeden berildi. SQO-da qazir 7 myńǵa jýyq tyl eńbekkeri bar eken.

«Árbir on oqtyń 9-y Qazaqstanda jasalǵan. Oǵan bizdiń úlesimiz zor dep esepteımiz. Tek 1941 jyly oblysqa 20-ǵa jýyq túrli zaýyt-kásiporyn evakýatsııalanǵan eken. Kolhozdar men sovhozdarda da kúndiz-túni jumys qyzyp turdy. Soǵys kezinde óńir jumysshylary jaýyngerlerge 88 vagon syılyq jibergen eken. Basqasyn aıtpaǵannyń ózinde. Sondyqtan tyl eńbekkerleriniń de soǵysta jeńip shyǵýymyzda qosqan úlesi zor», - deıdi Eskendir Eleýsizov.