SQO-da jeńildetilgen dızel jumys istemeıtin sharýashylyqtarǵa bólinip kelgen

PETROPAVL. QazAqparat – Soltústik Qazaqstan oblysynda jumysyn toqtatqan sharýashylyqtar esebinen jeńildetilgen dızel otynynyń kólemin arttyrý faktileri anyqtaldy, dep habarlaıdy QazAqparat tilshisi.

SQO Sybaılas jemqorlyqqa qarsy qyzmettiń basshysy Sergeı Perovtyń aıtýynsha, arzandatylǵan janar-jaǵarmaıdyń agroqurylymdarǵa jetýi vedomstvonyń baqylaýynda. Sondyqtan dızel otynynyń durys bólinýine qatysty aýyl sharýashylyǵy basqarmasynyń laýazymdy tulǵalarymen, arzandatylǵan dızel otynyn satatyn kásipkerlermen jáne operatorlarmen kezdesýler ótkiziledi.

Degenmen, operatorlar tarapynan birneshe ret shaǵymnyń túsýi sybaılas jemqorlyqqa qarsy monıtorıng júrgizýge negiz bolǵan.

«Sybaılas jemqorlyqqa qarsy monıtorıng júrgizýdiń nátıjesinde, jumysyn toqtatqan agroqurylymdardyń esebinen óńirge jeńildetilgen dızel otyny kóleminiń qajettiligin arttyrý jáne ony operatorlardyń arasynda ádiletsiz bólý derekteri anyqtaldy.

Departament baqylaýy nátıje berip, janar-jaǵarmaı tapshylyǵyna jol berilgen joq.

Sondyqtan, budan bylaı mundaı sybaılas-jemqorlyq táýekelderin boldyrmaý maqsatynda men Aýyl sharýashylyǵy mınıstrliginiń alańynda jeńildetilgen dızel otynyn bólýdiń ázirlenip jatqan erejeler jobasyna usynystar engizdim», - deıdi Sergeı Perov.

Buǵan deıin SQO-ǵa kóktemgi dala jumystaryna bıyl 74 myń tonnaǵa jýyq dızel otyny bólinetinin aıtqan edik. Dál qajet ýaqytta janar-jaǵar maı jetispeýshiligi týyndamas úshin bıyl suıyq otyn óńirge bir aı buryn jetkizile bastady.