SQO-da jeńil kólik at-shanany soǵyp, bir adam oqıǵa ornynda mert boldy
PETROPAVL. QazAqparat – Soltústik Qazaqstan oblysynda jeńil kóliktiń júrgizýshisi joldan burylmaq bolǵan at jegilgen shanany soǵyp, aýyl turǵyny sol jerde qaza tapty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jol-kólik oqıǵasy 25 jeltoqsan kúni Esil aýdany aýmaǵynda bolǵan. «Jezqazǵan-Petropavl» respýblıkalyq avtojolynyń 840 shaqyrymynda, Nıkolaevka eldi mekenine 5 km jetpeı Chevrolet Nexia avtokóliginiń júrgizýshisi at jegilgen shanaǵa soǵyldy. At-shananyń ıesi jaıaý qasynda kele jatqan. Qatty soqqydan aýyl turǵyny, 61 jastaǵy er adam alǵan jaraqattarynan oqıǵa ornynda qaza tapty.
Medıtsınalyq kýálandyrý Chevrolet Nexia avtokóliginiń júrgizýshisiniń spırttik ishimdik ishpegenin kórsetti.
Jol-kólik oqıǵasy QR QK-niń 345-babynyń 3-bóligi (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) boıynsha sotqa deıingi tergep-tekserýlerdiń biryńǵaı tizilimine engizildi.
Sotqa deıingi tergeý aıasynda polıtseıler jol-kólik oqıǵasynyń mán-jaıy men sebepterin anyqtap jatyr. Birqatar qajetti saraptama taǵaıyndaldy. Júrgizilgen is-sharalardyń nátıjeleri boıynsha túpkilikti protsessýaldyq sheshim qabyldanatyn bolady.
