SQO-da jemqorlyqpen kúreske meshit ımamdary jumyldyrylyp jatyr
PETROPAVL. QazAqparat - Soltústik Qazaqstan oblysynda sybaılas jemqorlyqpen kúres endi juma namazy kezinde nasıhattalyp, ýaǵyzdar aıtylatyn bolady, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamenti mamandarynyń málimetinshe, din qyzmetkerlerin uıymdastyrylyp jatqan jumystarǵa tartý maqsatynda bas maman Amangeldi Satanov Petropavl qalasy meshitteriniń ımamdarymen kezdesti.
«Sybaılas jemqorlyq - qoǵamnyń serpindi damýyn tejeıtin faktor. Oǵan qarsy kúres - búkil qoǵamnyń isi. Áleýmettik zertteýler kórsetkendeı, ekstremızmniń paıda bolý sebepteriniń biri - sybaılas jemqorlyq. Osyǵan oraı, bul indetpen kúresý úshin onyń kez kelgen kórinisterine múldem tózbeýshilik tanytý - azamattyq qoǵamda qolǵa alynýy tıis», - deıdi departamenttiń bas mamany Amangeldi Satanov.
Departament ókilderi Quran kárimde: «Zańsyz bir-birińizdiń múlkińizdi almańyz jáne basqa adamdardyń menshiginiń bir bóligin kúná jolmen alý úshin sýdıalardy satyp almańyzdar», - dep jazylǵanyn mysalǵa keltirýde.
«Qyzyljar» ortalyq meshitiniń bas ımamy Kenjetaı qajymen juma kúni SQO-nyń barlyq meshitterinde biryńǵaı ýaǵyz-nasıhat júrgizý týraly kelisim jasaldy. Petropavl qalasyndaǵy jańa meshittiń bas ımamy Qasymhan qajy da osy bastamany qoldady.
Departament aldaǵy ýaqytta da qoǵamda sybaılas jemqorlyqqa qarsy mádenıetti qalyptastyrýǵa baǵyttalǵan túsindirý is-sharalaryn turaqty negizde ótkizýdi jalǵastyrmaq.
