SQO-da jel energııasy stansylardyń qymbattyǵynan paıdalanylmaı otyr
PETROPAVL. QazAqparat - Soltústik Qazaqstan oblysy elimizde jel energııasynyń áleýeti jóninen ekinshi oryndy tur, dep habarlaıdy QazAqparat tilshisi.
Energetıka jáne turǵyn úı-kommýnaldyq sharýashylyǵy basqarmasy QazAqparatqa aımaqtaǵy jel energııasyn paıdalanýdyń bolashaǵy men túıitkilderi jóninde aıtyp berdi.
Qazir oblysta, naqty aıtqanda, Qyzyljar aýdanynda «Zenchenko ı K» komandıttik seriktestigi ornatqan 4 jel generatory jumys istep tur. Olardyń jalpy qýattylyǵy 3,5 MVt-ty quraıdy. Bastapqy eki jel generatory 2012 jyly salynsa, keıingi ekeýi 2015 jyly ornatylǵan.
«Ótken jyly «Zenchenko ı K» jel elektr stansysy 3,95 mıllıon kVt/saǵ elektr qýatyn óndirdi. Bul óńirde óndiriletin jalpy elektr energııasynyń 0,012% quraıdy. Jalpy alǵanda osy ýaqytqa deıin jel generatorlary 14,3 mıllıon kVt-saǵ elektr qýatyn óndirdi» - dedi basqarma basshysy Andreı Kalınıchev.
Eger bul energııany óndirý úshin kómirdi paıdalansaq, 9 myń tonna otyn qajet bolady. Kómirdiń osynsha mólsherin jaqqanda, shamamen 130 keli lastaýshy zattar men 3,9 tonna kúl paıda bolady.
«Soltústik Qazaqstan oblysynyń jel energııasyn óndirýdegi áleýeti joǵary. Qýattylyǵy 106 gıgavatt-tan asady. Bul - Qazaqstan boıynsha ekinshi oryn. Jel energııasyn paıdalaný jańartylǵan energııa kózderi salasynda basymdyqqa ıe bolyp otyr. Degenmen, jel elektr stansalarynyń qymbattylyǵynan atalmysh energııa kózin keń túrde qoldanýǵa múmkindik bolmaı otyr», - dedi A.Kalınıchev.
Ne degenmen, taıaýda aımaqta taǵy eki jel elektr stansysy paıda bolmaq. Greencity KZ jáne Ventac Group kompanııalary Taıynsha aýdanynda qýattylyǵy 35 MVt jáne 7,5 MVt bolatyn eki jel stansysyn salýǵa nıetti. Memorandýmǵa byltyrǵy jyly Investorlardy tartý jónindegi aımaqtyq keńestiń ІІІ otyrysynda qol qoıylǵan. Qazirde jer telimi bólindi, endi tehnıkalyq qujattama daıyndalýda.
