SQO-da jekemenshik balabaqshalar qarjylandyrýsyz qalýy múmkin
PETROPAVL. KAZINFORM — Petropavldaǵy jekemenshik balabaqshalar vaýcherlik qarjylandyrý jobasynyń ári qaraı qalaı júzege asatynyn bilmeı dal. Pılottyq joba naýryzdan shildege deıin uzartylǵanymen, áli kúnge qarjy bólinbegen.
Soltústik Qazaqstan oblysy Kásipkerler palatasyna Qazaqstan úzdiksiz bilim berý qaýymdastyǵynyń fılıaly júgindi. Másele Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste qaraldy.
SQO kásipkerler palatasynyń málimetinshe, vaýcherlik qarjylandyrý pılottyq jobasy 2025 jyldyń basynda iske qosylǵan. Oqý-aǵartý mınıstrliginiń buıryǵyna sáıkes, ol 2026 jyldyń 3 naýryzyna deıin belgilendi.
— Joba aıasynda taraptardyń ózara áreketi memlekettik satyp alý portalynda jasalǵan kelisimshart arqyly júzege asyryldy. Kelisimshartqa bilim bólimi, Qarjy ortalyǵy jáne mektepke deıingi uıymdar qatysty. Bıyl 27 aqpanda mınıstrlik jobany 1 shildege deıin uzartý týraly sheshim qabyldaǵanymen, balabaqshalardy qarjylandyrý máselesi belgisiz kúıde qalyp otyr. Óıtkeni memlekettik satyp alý portalyndaǵy qoldanystaǵy kelisimsharttyń merzimi 28 aqpanda aıaqtalǵan. Sonyń saldarynan kásipkerler jańa kezeńge qarjylandyrý tártibi jáne ózara áreket etý mehanızmderi týraly naqty aqparat ala almaı otyr, — deıdi kásipkerler palatasynyń sarapshysy Olga Dostler.
Soǵan qaramastan balabaqshalar jumysyn jalǵastyryp, balalardy qabyldap jatyr. Biraq kórsetilgen qyzmet úshin tólem jasalatynyna kepildik joq.
— Kelisimshartqa ata-analardyń da qatysy bar. Sondyqtan qazirgi jaǵdaıda olardyń quqyqtary da tolyq qorǵalmaǵan. Keıbir óńirlerde kelisimsharttar qaıta jasalyp jatqanymen, Astana, Shymkent qalalarynda, Soltústik Qazaqstan, Almaty Qaraǵandy, Qyzylorda jáne Túrkistan oblystarynda bul másele áli sheshilmegen, — deıdi Qazaqstan úzdiksiz bilim berý qaýymdastyǵy SQO fılıalynyń tóraǵasy Olga Jarkova.
Sonymen qatar jyl basynan beri qarjylandyrý keshiktirilip keledi. Balabaqsha basshylarynyń aıtýynsha, kommýnaldyq tólemder boıynsha qaryz jınalyp qalǵan. Internet pen telefon qyzmetin óshirý týraly eskertý túsken, elektr energııasynan ajyratý qaýpi de bar. Qyzmetkerlerdiń jalaqysy da keshigip tólengen.
Kásipkerler bul jaǵdaı kadr máselesine de áser etip jatqanyn aıtady. Keıbir tárbıeshiler jalaqynyń turaqsyzdyǵyna baılanysty jumystan ketken. Bul másele jekemenshik qana emes, memlekettik balabaqshalarda da bar. Qazir Petropavlda barlyǵy 49 mektepke deıingi uıym jumys isteıdi, olardyń 16-sy — jekemenshik.
Petropavl qalalyq bilim bóliminiń ókilderi qarjylandyrýdyń ýaqtyly bolmaýy Qarjy ortalyǵy tarapynan bıýrokratııalyq rásimdermen baılanysty ekenin aıtty. Qarjy balabaqshalardyń 80% qańtardyń sońǵy kúni, keıbir balabaqshalarǵa tek aqpannyń basynda, al aqpan aıynyń tólemderi naýryzdyń 4–5 kúnderi ǵana túsken.
Qazirgi ýaqytta bilim bólimi naýryz ben maýsym aılary aralyǵyna arnalǵan jańa kelisimsharttar jasaý úshin barlyq qajetti derekti joldaǵan. Alaıda Qarjy ortalyǵynan áli resmı jaýap joq.
Buǵan deıin elimizdegi balabaqshalarda pılottyq joba iske qosylǵanyn jazǵan edik.