SQO-da jeke úıde gaz ballony jarylyp, eki adam zardap shekti

PETROPAVL. KAZINFORM – Soltústik Qazaqstan oblysy Taıynsha qalasyndaǵy jeke turǵyn úıde gaz ballony jaryldy. 

SQO tótenshe jaǵdaılar departamenti baspasóz qyzmetiniń málimetinshe, oqıǵa keshe saǵat 18.00 shamasynda bolǵan. Taıynsha kóshesindegi jeke turǵyn úıde turmystyq gaz ballony jarylyp, arty órtke ulasqan. 

Úıdiń ıesi, 50 jastaǵy er adam jáne onyń 16 jastaǵy qyzy kúıik alyp, birden aýrýhanaǵa jetkizildi. 

– Jaǵdaılary aýyr, deneleriniń 60-70%-yn kúıik shalǵan. Tynys alý músheleri kúıip qalǵan. ókpeni jasandy jeldetý apparatyna qosylǵan. Sanavıatsııamen balalardyń jáne eresekterdiń reanımatolog, anestezıolog mamandaryn alǵyzyp jatyr, - deıdi SQO densaýlyq saqtaý basqarmasynyń baspasóz hatshysy Gúlnar Qalıeva.

Saǵat 19.30-da órt tolyǵymen sóndirildi. Oqıǵa ornynda órt sóndirý qyzmeti jeke quramynan 15 adam jáne 2 tehnıka jumys istedi, sondaı-aq memlekettik emes órt sóndirý qyzmetinen 7 adam, 2 tehnıka jumyldyryldy. 

Qazirgi ýaqytta osy derekke qatysty tergeý júrip jatyr. 

Budan bir kún buryn, 9 jeltoqsanda osy aýdannyń Leonıdovka eldi mekeninde jeke turǵyn úıdiń garajynda órt shyǵyp, garaj jáne eki jeńil kólik tutas janyp ketti. 

Órt sóndirýshiler jalynnyń úıge taralýyna jol bermedi. Zardap shekkender joq. Órttiń shyǵýyna peshti qoldanýda órt qaýipsizdigi normalaryn saqtamaý sebep bolǵan. 

Buǵan deıin Petropavlda dárigerler jas jigittiń júreginen temir tikendi alyp shyqqanyn jazǵan edik.