SQO-da jeke turǵyn úı órtenip, úsh adam mert boldy

PETROPAVL. KAZINFORM – Úsh adamnyń ómirin jalmaǵan órt Soltústik Qazaqstan oblysy Maǵjan Jumabaev aýdany Poltavka aýylynda boldy.

SQO Tótenshe jaǵdaılar departamenti baspasóz qyzmetiniń málimetinshe, úıdiń jalynǵa oranǵany týraly habar búgin keshke «112» pýltine kelip tústi.

Oqıǵa ornyna órt sóndirýshiler birden attanǵanymen, olar kelgende ǵımarat jalyndap janyp jatqan. Órt sóndirý barysynda úıden 57 jastaǵy áıeldiń, 44 jáne 46 jastaǵy eki er adamnyń múrdesi tabyldy.

40 sharshy metr aýmaqty qamtyǵan órt tolyq sóndirildi. Qazirgi ýaqytta jalynnyń shyǵý sebebi anyqtalyp jatyr. Órtti sóndirýge 8 maman jáne 3 arnaıy tehnıka jumyldyryldy.

Buǵan deıin Almaty oblysynda qoqys polıgonyndaǵy órtti sóndirýge 120-ǵa jýyq adam jumyldyrylǵanyn jazǵan edik.