SQO-da jeke kásipkerler maska óndirisin jolǵa qoıdy
PETROPAVL. QazAqparat – Soltústik Qazaqstan oblysy Taıynsha aýdanynda shaǵyn tigin tsehtary kóp rettik maskalardy tigip, halyqtyń suranysyn qanaǵattandyryp jatyr, dep habarlaıdy QazAqparat tilshisi.
SQO Taıynsha aýdanynda kóp rettik maskalardy tigýdi úsh jeke kásipker qolǵa aldy. Olardyń árqaısysy óz shaǵyn tigin tsehtarynda kúnine 200-deı maska ázirleıdi.
Taıynsha qalasynyń 21 jastaǵy turǵyny Albına Qaıyrbekova osydan úsh jyl buryn «Bastaý Bıznes» memlekettik baǵdarlamasymen kásipkerliktiń negizin meńgerip, óz tigin tsehyn ashqan. Bastapqyda kıim-keshekti jóndeýmen aınalysqan jas kásipker, tájirıbe jınaqtaı kele jurttyń suranysy boıynsha jeke úlgimen kóılek, kostıým tigýdi qolǵa alady. Endi eldegi jaǵdaıǵa baılanysty bar kúshti maska tigýge jumyldyrǵan.
«Elde tótenshe jaǵdaı jarııalanysymen biz kásipkerlerdi jınap, olarǵa maskaǵa degen qajettiliktiń týyndaǵanyn túsindirdik. Qyzdar bizdiń usynysymyzdy qabyl alyp, birden iske kirisip ketti. Maqta matadan tigilgen, kóp rettik maskalardyń bireýiniń quny 300-400 teńge aralyǵynda. Turǵyndar alyp jatyr», - deıdi Taıynsha aýdandyq kásipkerlik bóliminiń jetekshisi Natalıa Golýb.
Natalıa Golýbtiń aıtýynsha, aýyldyq okrýgterdegi qolynan is keletin úı sharýasyndaǵy keı qyz-kelinshekter de óz úlesterin qosyp jatyr. Nátıjesinde búginde aýdanda maskaǵa degen qajettilik azaıǵan.
