SQO-da jedel járdem kóligi jol apatyna tústi: Zardap shekkender bar
PETROPAVL. QazAqparat – Soltústik Qazaqstan oblysynda jedel járdem men jeńil kólik soqtyǵysty. Úsh adam zardap shekti, dep habarlaıdy QazAqparat tilshisi.
Jol-kólik oqıǵasy ornynda túsirilgen vıdeo áleýmettik jelide tarady.
SQO Polıtsııa departamenti baspasóz qyzmetiniń málimetinshe, oqıǵa búgin saǵat 5.20 shamasynda Qyzyljar aýdany Peterfeld eldi mekeniniń mańynda bolǵan. Jolda Petropavlǵa bara jatqan jedel járdem men «Aýdı» kóligi soqtyǵysty. Saldarynan arnaıy kóliktegi bir jolaýshy men jeńil kóliktegi eki adam jaraqattandy. «Aýdıde» bolǵan Mamlıýtka qalasynyń turǵyny, 58 jastaǵy er adam aýrýhanaǵa jatqyzyldy. Jedel járdemdegi 28 jastaǵy júkti kelinshek te medıtsınalyq mekemege jetkizildi. Arnaıy kólik ony perınataldyq ortalyqqa apara jatqan.
Qazir oqıǵa ornynda Qyzyljar aýdany polıtsııa bóliminiń jedel tergeý toby jumys isteýde. Sotqa deıingi tergeý barysynda tártip saqshylary istiń mán-jaıyn anyqtaıtyn bolady. Tıisti saraptamalar ótkizilmek.
