SQO-da jazǵy balalar lagerlerinen órt qaýipsizdigi talabyn buzýdyń 80 deregi anyqtaldy
PETROPAVL. KAZINFORM — SQO Tótenshe jaǵdaılar departamenti baspasóz qyzmetiniń málimetinshe, óńirdegi birqatar balalar saýyqtyrý lagerlerinde órt qaýipsizdigi talaptaryn buzýdyń 80-nen astam deregi tirkelgen. ıAǵnı, balalardyń jazǵy demalys oryndarynda órt qaýipsizdigi saqtalmaǵan.
— Órtterdiń aldyn alý maqsatynda balalardyń jazǵy demalys oryndary men saýyqtyrý lagerlerin ustaý tártibi qarastyrylǵan. Keı lagerlerde syrtqy órtke qarsy sýmen jabdyqtaý júıesi joq, al bar nysandardaǵy sý qory tótenshe jaǵdaı kezinde órtti der kezinde sóndirýge jetkiliksiz. Alda taǵy 4 lagerge profılaktıkalyq tekserý júrgizý josparlanyp otyr, — deıdi SQO TJD basqarmasy bastyǵynyń orynbasary Aıan Qusaıynov.
Tekserý qorytyndysy boıynsha lagerlerdiń basshylaryna nusqamalar berilip, nysandardy qaýipsizdik talaptaryna sáıkestendirý boıynsha usynymdar joldandy.
Mamandardyń aıtýynsha, sońǵy 5 jylda balalardyń jazǵy demalys oryndarynda eki órt tirkelgen. Qyzyljar aýdanyndaǵy «Serebrıanyı bor» jáne «Zolotaıa osen» lagerlerinde órt — elektr symdarynyń qysqa tuıyqtalýy jáne otpen abaısyz jumys isteýden shyqqan. Saldarynan qurǵaq shóp janyp, keıin aǵash qurylystar jalynǵa orandy.
— Órttiń aldyn alýda negizgi talaptardyń oryndalýyn qamtamasyz etý qajet. Atap aıtqanda, mıneraldandyrylǵan jolaqtar jasaý, dabyl berý júıelerin jaramdy kúıde ustaý, sý kózderin qamtamasyz etý, táýlik boıy kezekshilik uıymdastyrý jáne bastapqy órt sóndirý quraldarymen jabdyqtaý mindettelgen. Sonymen birge balalardy qaýipsizdik talaptaryna saı kelmeıtin nysandarǵa ornalastyrýǵa jol bermeı, ashyq ot pen pırotehnıkany buıymdardy jáne elektr jylytý quraldaryn paıdalanýǵa tyıym salý qajet, — deıdi Aıan Qusaıynov.
Mamandardyń aıtýynsha, bıyl SQO-da jyl basynan beri 195 órt tirkelgen. Bul ótken jylmen shamalas bolǵanymen, adam shyǵyny artqan. Oblys boıynsha 18 adam órtte mert bolǵan, onyń ishinde 3 bala bar. Bul — ótken jylmen salystyrǵanda 20% kóp.
Buǵan deıin TJM terek mamyǵy órt qaýpin kúsheıtetinin eskertkenin jazǵan edik.
