SQO-da jazda 10 lager jumys isteıdi: demalys baǵasy qansha
PETROPAVL. KAZINFORM - Soltústik Qazaqstan oblysynda balalardyń jazǵy demalysynda 10 saýyqtyrý lageri jumys isteıdi dep josparlanǵan.
Qazirgi ýaqytta demalys oryndary maýsymǵa daıyndyqty bastap ketken. Bıyl da lager ınfraqurylymyn jańartý jáne balalardyń demalysyn zamanaýı talaptarǵa saı uıymdastyrý baǵytynda júıeli jumystar júrgizilip jatyr.
SQO bilim basqarmasy baspasóz qyzmetiniń málimetinshe, lagerlerdiń úsheýi senimgerlik basqarýǵa berilgen. Olar - Taıynsha aýdanyndaǵy «Edelveıs Býrabaı» lageri men Qyzyljar aýdanyndaǵy «Dostyq» jáne «Aqqaıyń» lagerleri. Qalǵan saýyqtyrý oryndarynyń jumysyna jergilikti atqarýshy organdar jaýapty.
- Bıyl memlekettik lagerlerge joldamanyń quny 35 myńnan 55 myń teńgege deıin bolady. Jalpy alǵanda, jaz mezgilinde 6 330 balany qala syrtyndaǵy demalyspen qamtý josparlanǵan.
Birinshi kezekte balalardyń qaýipsizdigine basymdyq beriledi, - deıdi basqarmanyń baspasóz hatshysy Ásel Orazbaeva.
Mamannyń aıtýynsha, dástúrli saýyqtyrý lagerlerimen qatar, óńirde jazǵy demalystyń balamaly túrleri de damyp keledi. Mektepter janynan bıyl 202 jazǵy alań, 225 beıindik alań jáne 97 kıiz úı men shatyrly lager uıymdastyrylady. Sonymen birge, oqýshylardyń týǵan ólkeni tanyp-bilýine baǵyttalǵan «Eldi zertteý» jobasy jalǵasady.
Al ishki týrızmdi damytý maqsatynda oqýshylar úshin Astana men Petropavl qalalaryna ekskýrsııalyq saparlar, sondaı-aq elimizdiń kıeli jerlerine tanymdyq saıahattar uıymdastyrylady. Oqýshylar saraıy janynan «Jazǵy Akademııa» jumysyn jalǵastyrady.
Al «Bir kún qalada» jobasy aıasynda aýyl oqýshylary oblys ortalyǵynyń kórikti jerlerimen tanysýǵa múmkindik almaqshy.
Búǵan deıin demalys is-sharalarymen bıyl 3,2 mln balany qamtý josparlanǵanyn jazǵan edik.
