SQO-da jazasyn óteýshiler óz kásipterin ashyp jatyr
PETROPAVL. QazAqparat – Soltústik Qazaqstan oblysynda probatsııa qyzmetiniń esebinde turǵandar «Bastaý-Bıznes» memlekettik baǵdarlamasy aıasynda kásipkerliktiń negizderin meńgerip, grant alyp, óz isterin ashyp jatyr, dep habarlaıdy QazAqparat tilshisi.
SQO-da byltyr «Bastaý-Bıznes» memlekettik baǵdarlamasy aıasynda sottalǵandardyń 23-i kýrstan ótip, sertıfıkat aldy. Olardyń altaýy óz bıznes-jobalarynyń tıimdiligin dáleldep, 100 jáne 200 AEK mólsherinde grant aldy.
«Bas bostandyǵy shektelgen nemese túzeý jumystaryna jegilgen turǵyndardyń, shartty túrde merziminen buryn bosatylǵandardyń eń aldymen óz kásibin ashýǵa degen yntasy bolýy qajet. Tilek bildirgen jaǵdaıda probatsııa qyzmeti kásipkerler palatasy arqyly olardy kýrstarǵa jiberedi. Sertıfıkat alyp, jobasyn qorǵaǵannan keıin grant beriledi nemese shaǵyn nesıe alýyna múmkindik bar. Byltyr kýrstan ótken 6 adam grant aldy», - deıdi SQO Qylmystyq atqarý júıesi departamentiniń bastyǵy Rýstan Ahmetjanov.
Byltyr grant alǵan sottalǵandar negizinen aýyl sharýashylyǵy salasyn tańdap, mal-qus basyn kóbeıtýmen aınalysyp jatyr. Aıaq kıim tigý sheberhanasyn ashyp, balyq ósirýdi qolǵa alǵandary da bar.
Bıyl eki sottalǵan 555 myń 600 teńge grant aldy. Jeke kásipkerlik ashqan Qyzyljar aýdanynyń turǵyny ósimdik sharýashylyǵymen aınalyspaq. Shartty túrde merziminen buryn bosatylǵan ol probatsııa qyzmetiniń de esebinen alyndy.
Al M.Jumabaev aýdanynyń turǵyny 200 AEK mólsherinde alǵan grantyna qus ósirýdi kózdep otyr.
Mamlıýt aýdanynyń 27 jastaǵy turǵyny Erjan da probatsııa qyzmetiniń esebinde tur. Kvota boıynsha JShS-ke qara jumysshy bolyp ornalasqan ol jańa kásipti meńgerdi. Ol búginde ózi úılerge sý tartyp, qajetti tehnıkany ornata alady. Endi óz isin ashýdy josparlaýda.
«Uńǵyma qazdyryp, úılerine sý kirgizip jatqan turǵyndar kóp. Bul qyzmet búginde suranysqa ıe. Qazir bul jumystardy jeke kásipkerlik ashpaı dosym ekeýmiz atqaryp júrmiz. Biraq munymen kásibı túrde aınalysqym keledi. Keler jylǵa «Bastaý-Bıznes» kýrsyna jazyldym. Probatsııa qyzmeti qoldaý bildirdi. Grant berilgen jaǵdaıda oǵan qajetti qondyrǵy almaqpyn», - deıdi jazasyn óteýshi Erjan.
