SQO-da jazasyn óteýshiler lımon, mandarın, júzim ósirip jatyr
PETROPAVL. QazAqparat – Petropavldaǵy ES 164/6 mekemesindegi jylyjaıda sottalǵandar kókónisterden basqa lımon, mandarın, júzim ósirýdi qolǵa aldy, dep habarlaıdy QazAqparat tilshisi.
Soltústik Qazaqstan oblysy boıynsha qylmystyq-atqarý júıesi departamentiniń ES 164/6 mekemesinde 4 jyl buryn jylyjaı ashyldy. Osylaısha mekeme ózin qııar, qyzanaq jáne bolgar buryshymen tolyq qamtyp otyr, artylǵany satylady. Qııardan ǵana aptasyna 160 kelige deıin ónim alynady. Al bolgar buryshynyń bireýiniń salmaǵy jarty kelige deıin barady eken. Endi munda jemis aǵashtary da paıda boldy.
Mekemede jazasyn ótep júrgen Olesıa Rýsak jylyjaıda eńbek etedi. Baǵbandyqty osynda úırengen kelinshek byltyr qysta júzim, lımon, mandarın jemisteriniń dánin jerge sińirip, baptaýǵa kirisedi. Eńbegi esh bolmaı óskinder shyqty. Endi jemis aǵashtarynyń kútimi týraly kelinshek bilimin arnaıy kitaptardan jetildirip júr.
«Bul jemisterdi ósirý úshin eń bastysy jyly jáne kún bolýy qajet. Jylyjaıymyz polıkarbonattan jasalǵan, ol kún sáýlesin eseleı túsedi. Sol sebepti jaqsy ósip jatyr. Ýaqytynda sýarý kerek, al lımonǵa, sondaı-aq sý búrký qajet. Al jemis berýi úshin olardy telý kerek, sonda ǵana ónim bere bastaıdy», - deıdi Olesıa Rýsak.
Mekeme aýmaǵynda shaǵyn ferma da ornalasqan. Munda taýyq pen qoıan ósiredi, jylqy ustaıdy. Endi sándik qoıandar da paıda boldy.
«Kásipker úıde ustaıtyn sándik qoıannyń bireýin ákeldi. Ony biz ózimizdegi qoıandarmen kóbeıttik. Ádemi, kózderi ádettegideı qyzyl emes, kókshil, qara bolyp keledi. Olarǵa qajet jemazyqty da ózimiz ósiremiz. Gıdroponıka ádisimen ósiriletin shóptiń quramynda 16 túrli dárýmen bar. Sol sebepti janýarlar ony súısinip jeıdi. Biz fermadaǵy qoıandarǵa bul shópti kúnine 2 ret beremiz», - deıdi Olesıa Rýsak.
Qazirgi ýaqytta mekemede 200-den asa kelinshek jazasyn ótep jatyr. Sonyń 95 %-y jumyspen qamtylǵan. Eńbekaqylar 40 myń teńgeden joǵary.
«Mundaǵy sottalǵandardyń basym bóligi, ıaǵnı 140 áıel «Eńbek Qyzyljar» JShS-de tiginshi bolyp eńbektenedi. Olar arnaıy kıim, tósek oryn tigedi. Jalpy mekeme aýmaǵynda 3 kásipker jumys isteıdi, biri tiginshilikpen aınalyssa, ekinshisi qurylys materıaldaryn shyǵarady, qus-qoıan ósirip, jylyjaı ustaıdy, osylaısha 5 adamdy jumyspen qamtyp otyr, úshinshisi oıynshyq qonjyqtar tigedi, ol jerde 4 adam jumys isteıdi. Jazasyn óteýshiler eńbekaqysynyń jartysy qaryzdaryn óteýge ketse, qalǵanyn ózderiniń kerek-jaraqtaryna jumsaı alady, týǵan-týystaryna, balalaryna kómektesedi», - deıdi ES-164/6 mekemesi bastyǵynyń orynbasary Gúlnár Syzdyqova.
