SQO-da jazasyn óteýshiler attestat aldy
PETROPAVL. QazAqparat – Soltústik Qazaqstan oblysyndaǵy ES-164/6 jáne ES-164/3 mekemelerinde jazasyn ótep jatqandar mektep bitirip, olarǵa negizgi jáne jalpy orta bilim týraly attestattar tabys etildi, dep habarlaıdy QazAqparat tilshisi.
Soltústik Qazaqstan oblysy Qylmystyq atqarý júıesi departamenti baspasóz qyzmetiniń málimetinshe, Petropavldaǵy ES-164/6 áıelder kolonııasynda mektepte erkindikte júrip orta bilim ala almaǵan áıelder oqıdy.
«Zań boıynsha sottalǵandar orta bilim alýǵa mindetteledi. Jasy otyzdan asqandarmen bilim alýdyń, saýat ashyp, oı-óristi keńeıtý qajettiligi týraly tárbıe jumysy júrgiziledi. Keıbir áıelder sottalǵanǵa deıin oqyǵysy kelmegen, keıbirine ómirlik jaǵdaılarǵa baılanysty mundaı múmkindik bolmady. Túsindirý jumystary oń nátıje beredi. Bilim alýǵa umtylý – onyń ómirlik ustanymdarynyń ózgerip, durys jolǵa bet alǵanyn bildiredi», - deıdi SQO boıynsha QAJD ES-164/6 mekemesiniń sottalǵandar arasyndaǵy tárbıe jáne áleýmettik-psıhologııalyq jumys bóliminiń jasaq bastyǵy Tana Qazjanova.
Petropavldaǵy ES-164/3 mekemesinde de jazasyn óteýshilerge attestat berý rásimi ótti.
«Koronavırýsty ınfektsııanyń taralýyna jol bermeý maqsatynda mektep bitirýshi jazasyn óteýshilerge attestat berý rásimi barlyq sanıtarlyq talaptardy saqtaı otyra saltanatty jaǵdaıda ótkizildi. ES-164/6 mekemesinde 15 sottalýshy mektepte oqıdy. Olardyń úsheýi – 9-synypty, tórteýi – 12-synypty bitirgendigi jóninde attestat aldy. Al ES-164/3 mekemesinde 10 adamǵa mektep bitirgendigi jóninde qujat berildi», - deıdi SQO boıynsha QAJD bastyǵy Rýstan Ahmetjanov.
Syrttaı-konsýltatıvtik pýnkttiń oqytýshylary jazasyn óteýshilerge negizgi jáne jalpy orta bilim týraly attestattardy tabys etti. Sondaı-aq, olar mektep bitirýshilerdi quttyqtap, týǵan-týysqandary men jaqyndaryna tezirek oralýyn tiledi.
