SQO-da jazasyn ótep jatqan áıeldiń óleńder jınaǵy jaryqqa shyqty

PETROPAVL. QazAqparat – Soltústik Qazaqstan oblysyndaǵy ES- 164/6 mekemesinde jazasyn ótep jatqan Tatıana Magombenova «Qatelik baǵasy» atty óleńder jınaǵyn jaryqqa shyǵardy, dep habarlaıdy QazAqparat tilshisi.

SQO Qylmystyq atqarý júıesi departamenti baspasóz qyzmetiniń málimetinshe, Tatıana Magombenova 10 jylǵa bas bostandyǵynan aıyrylǵan, onyń tórt jylyn ótedi.

«Áke-sheshem parasatty adamdar. Men olardy úlgi tutamyn. Shalys basqanym úshin, olardyń úmitterin aqtamaǵanym úshin uıalamyn. Bostandyqta meni anam jáne 21 jastaǵy ulym asyǵa kútýde», - deıdi aǵynan jarylǵan Tatıana.

Tatıananyń negizgi mamandyǵy – fotokorrespondent. Alaıda ol alǵan bilimimen jumys istemeı, kásipkerlikke bet burady. Shaǵyn shashtaraz ashady.

2014 jyly ómirine áser etken er adamdy kezdestiredi. Kóp ýaqyt ótpeı tártip saqshylary onyń úıinen esirtki taýyp, buǵan esirtki zattaryn satýmen aınalysty degen aıyp taǵylǵan. Sottyń úkimimen 10 jylǵa bas bostandyǵynan aıyrylady.

2016 jyldan beri ES- 164/6 mekemesinde jazasyn ótep jatqan áıel barlyq is-sharalarǵa belsendi qatysady.

«Tatıana ándi de jaqsy aıtady, bıleıdi de. Bizge kelgennen keıin óleń jaza bastady. Osylaısha ol óziniń kúıinishi men ýaıymyn, jan tolǵanysyn qaǵazǵa túsirdi. Oblystaǵy aqyndarǵa kórsetip, olardyń maquldaýynan keıin Tatıananyń óleńderiniń bir parasy «Ómirdi baǵala» atty óleńder jınaǵyna basyldy», - deıdi SQO QAJD «ES-164/6 mekemesi» RMM jazasyn óteýshiler arasynda tárbıe jáne áleýmettik-psıhologııalyq qyzmet bóliminiń bastyǵy Oksana Vyshar.

Tatıananyń shyǵarmalary anaǵa degen mahabbatqa arnalǵan. Jasaǵan qylmysqa ókiný jáne shalys basqanyn túsiný de onyń óleńderine arqaý bolǵan.

«M.Averın atyndaǵy ádebı birlestiktiń ókili Oksana Efremovanyń usynysymen jarty jylǵa jýyq Tatıana óleń qurylysynyń teorııasy jaıynda kýrstan ótti. Bizde jazasyn ótep jatqandardyń ishinde túrli adamdar bar. Olardyń árqaısysymen jumys istep, týra jolǵa túsýlerine kómektesý – mindetimiz. Bul joly da Tatıananyń darynyn baıqaǵannan keıin mekeme ákimshiligi onyń jeke óleńder jınaǵyn shyǵarýǵa kómektesýdi sheshti.

Onyń 40 óleńi tańdalyp alynyp, synshylardyń nazaryna usynyldy.

Keıin metsenat taýyp, jınaq jaryqqa shyqty. Aıtaıyn degenim, qandaı qıyn jaǵdaı bolmasyn ómirden túńilmeý qajet», - deıdi Oksana Vyshar.