SQO-da jazasyn óteýshiler ulttyq qolónerdi meńgerip, at ábzelderin jasaıdy
PETROPAVL. KAZINFORM – Soltústik Qazaqstan oblysy boıynsha qylmystyq-atqarý júıesi mekemelerinde sottalǵandar arasynda ulttyq qolónerdi damytýǵa basymdyq berilgen.
SQO QAJ departamenti baspasóz qyzmetiniń málimetinshe, №48 mekemede at ábzelderin jasaıtyn arnaıy tseh ashylǵan. Sottalǵandardy bul kásipke sheber Vladımır Osıpov úıretken. Ol bul salada 12 jyldan astam ýaqyt eńbek etip keledi jáne 2021 jyly óndiristi jolǵa qoıyp, jazasyn óteýshilerdi jumysqa aldy. Qazir tsehta 11 adam jumyspen qamtylǵan.
- Kásipti tolyq meńgertý úshin arnaıy mamandardy shaqyrdym. Olar sottalǵandardy tigýge jáne materıaldarmen jumys isteýge úıretti. Orta eseppen alǵanda, bul kásipti tolyq ıgerý úshin shamamen úsh aı ýaqyt qajet, - deıdi Vladımır Osıpov.
Sottalǵandar er-toqym, júgen, noqta, tizgin, úzeńgi, qamshy jáne basqa da qajetti buıymdardy jasaıdy. Sonymen qatar bylǵarydan beldik, qarǵybaý da isteıdi.
- Bul jumys úlken uqyptylyqty, muqııattylyqty jáne tózimdilikti talap etedi. Máselen, bir beldikti daıyndaýǵa jarty kúnge jýyq ýaqyt ketse, bir kúnde alty júgenge deıin jasaýǵa bolady. Daıyn ónimder tek SQO-da ǵana emes, elimizdiń basqa óńirlerinde jáne shetelde de suranysqa ıe, - deıdi kásipker.
Jazasyn óteýshilerdiń biri burynnan qolónerge jaqyn bolǵan eken. Onyń aıtýynsha, bala kezinde atasy qamshy órgen. Sottalǵanǵa deıin ártúrli salada tas qalaýshy, aǵash sheberi jáne dánekerleýshi bolyp jumys istegen. Vladımır Osıpovtyń tsehyna jumysqa ornalasqannan keıin teri men kıizden buıym tigýdi úırenip, qamshy órýdi tolyq meńgerip aldy.
- Bul jumys men úshin tek tabys kózi nemese ýaqyt ótkizý emes. Sapaly buıymdar jasap, ulttyq dástúrlerdi saqtaýǵa paıdam tıse eken deımin. Bostandyqqa shyqqanda da kerek bolady, - deıdi sottalǵan.
Sonymen qatar óńir mekemelerinde aǵash óńdeýmen de aınalysady. Sottalǵandar ulttyq naqyshtaǵy buıymdar - sandyqtar, astaý, ústelder jáne basqa da turmystyq zattardy jasap, olardy qazaqy oıý-órnektermen bezendiredi.
Mamandardyń aıtýynsha, ulttyq qolónerdi damytý sottalǵandardyń eńbek daǵdylaryn qalyptastyrýǵa, tártip pen jaýapkershilikti arttyrýǵa yqpal etedi. Al alǵan bilim men tájirıbe bostandyqqa shyqqannan keıin olarǵa jumysqa ornalasýǵa nemese jeke kásip ashýǵa negiz bola alady.
Jalpy №48 mekemede shamamen 650 sottalǵan jazasyn ótep jatyr. Sonyń 415-i jumyspen qamtylǵan. Mekeme aýmaǵynda alty jeke kásipker sottalǵandardy eńbekke tartyp otyr.
Buǵan deıin SQO-da sottalǵandarǵa kómek kórsetetin JI keńesshi iske qosylatynyn jazǵan edik.
