SQO-da jazasyn óteýshiler arasynda nekege turatyndar sany artqan

PETROPAVL. KAZINFORM — Soltústik Qazaqstan oblysynda jyl basynan beri 35 jazasyn óteýshi nekege turdy. Máselen byltyr bir jyl ishinde 18 neke tirkelgen.

SQO boıynsha qylmystyq-atqarý júıesi departamenti baspasóz qyzmetiniń málimetinshe, óńirde vedomstvoǵa qaraıtyn bes mekeme bar. Sonyń bireýi — áıelder kolonııasy. Munda bıyl eki sottalǵan turmysqa shyqqan.

Aıyrtaý aýdanynda ornalasqan № 51 mekemede jaqynda jazasyn óteýshi nekesin qıdy. 37 jastaǵy er adam alǵash ret otbasyn quryp otyr.

— Jubaıymen bes jylǵa jýyq tanys. Qarym-qatynastaryn osylaısha zańdastyryp otyr. Urlyq jasaǵany úshin ustalǵan, áli úsh jyly bar. Biz sottalǵandardyń otbasyn qurýǵa degen umtylysyn qoldaımyz. Óıtkeni bul olardyń ómirge degen qulshynysyn arttyrady, tezirek jazasyn ótep, otbasyna oralýǵa yntalandyrady. Jaýapkershilik sezimin arttyryp, oń ózgeristerge umtylýǵa yqpal etedi, — deıdi SQO boıynsha QAJD bastyǵynyń orynbasary Qanat Súleımenov.

Mamandardyń aıtýynsha, resmı nekege turǵannan keıin jubaıymen uzaq merzimdi kezdesýlerge ruqsat berilmek. 

Jazasyn ótep júrip úılengen er adam qazir mekeme aýmaǵynda aǵash jáne metall buıymdaryn jasaýmen aınalysady. Al bostandyqqa shyqqannan keıin óz sheberhanasyn ashpaq.

Buǵan deıin QR Konstıtýtsııasynyń 30 jyldyǵyna oraı jarııalanǵan raqymshylyq aıasynda SQO-daǵy № 50 mekemede jazasyn ótep jatqan alǵashqy áıel bostandyqqa shyqqanyn jazǵan edik.