SQO-da jaıaý júrginshilerge jol bermegen júrgizýshiler qomaqty aıyppul tóledi
PETROPAVL. QazAqparat – Soltústik Qazaqstan oblysynda jaıaý júrginshini ótkizbegen kólik júrgizýshilerine aıyppul salynyp jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, «Abaılańyz, balalar!» jedel-profılaktıkalyq is-sharasy sheńberinde polıtsııa qyzmetkerleri jaıaý júrginshilerge qatysty Jol qozǵalysy erejelerin qatań saqtaý qajettigin júrgizýshilerdiń esterine saldy.
«Oqý jylynyń bastalýyna baılanysty oblys ortalyǵynyń joldarynda jaıaý júrginshi - oqýshylar kóbeıdi. Olar, ásirese bastaýysh klastyń oqýshylary mektepke kóbine eresektersiz, ózderi barady. Júrgizýshiler muny esten shyǵarmaı, jol ústinde saq bolýy tıis. Júrginshige jol bermegen jaǵdaıda júrgizýshiler Ákimshilik quqyq buzý týraly QR Kodeksiniń 600-baby boıynsha 10 aılyq eseptik kórsetkish kóleminde aıyppul tóleıdi», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Qyrkúıek aıynda júrgizýshilerdiń tártibi áldeqaıda jaqsarǵan. Bul aıda júrginshilerge jol bermeýdiń 26 faktisi anyqtaldy. Jyl basynan osyǵan uqsas 600-den astam derek tirkeldi. Atalǵan quqyq buzýshylyq úshin soltústikqazaqstandyq júrgizýshiler 6 mln astam teńge aıyppul tóledi.
Qyrkúıek aıynda polıtseıler Jol qozǵalysy erejelerin buzý boıynsha 3 myńnan astam faktini anyqtaǵan. Onyń 425 faktisi – belgilengen jyldamdyqty asyrý, 341-i – jaıaý júrginshilerdiń jol erejesin buzýy. 34 júrgizýshi kólik quralyn mas kúıde júrgizgeni úshin ustaldy.
