SQO-da jaıaý jolǵa shyǵyp, adasyp ketken 33 jastaǵy er adam qutqaryldy
PETROPAVL. QazAqparat – Soltústik Qazaqstan oblysy Esil aýdanynda qutqarýshylar kórshi aýylǵa jaıaý shyǵyp, jolda adasyp ketken er adamdy qutqardy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, 5 aqpan kúni saǵat 15.30 shamasynda TJD kezekshi bólimine adasyp ketken er adam habarlasqan. Ol óziniń Esil aýdany Qaraǵash aýylynan Aqqaıyń aýdanynyń Rýblevka eldi mekenine jaıaý shyǵyp, adasyp ketkenin aıtqan. 10 shaqyrym júrgen 33 jastaǵy er adam baǵyttan aıyrylǵanyn túsinip, 112 telefon nómirine qońyraý shalypty. Ol uıaly telefonynyń batareıasy otyrmaı turyp, jaqyn mańda elektr taratý jelileriniń bar ekenin aıtyp úlgeripti.
Birden eki aýdannyń tótenshe jaǵdaılar bólimi, polıtsııa qyzmetkerleri men jergilikti atqarýshy bılik ókilderi habardar etildi. ıAvlenka eldi mekenindegi №10 órt sóndirý bóliminen «TREKOL» jol talǵamaıtyn kóligimen izdeý-qutqarý toby attandy.
Іzdeý sharalary 6 saǵatqa sozyldy. Sol kúni júrgen qar kóshkini qutqarýshylardyń jumysyn qıyndata tústi. Úmit úzile bastaǵan ýaqytta olardyń kózine ıesiz qalǵan qoımanyń ǵımaraty jáne soǵan aparǵan iz túsedi. Ot jaǵyp, jylynyp otyrǵan adam qutqarýshylardy kórip, qatty qýanady.
«Qutqarýshylar men polıtsııa qyzmetkerlerine alǵysym sheksiz. Olar meni tappaǵanda ne bolaryn oılaýdyń ózi qorqynyshty. Búgin qaıta týdym dese bolady», - deıdi Dáýren.
Ol Qaraǵash aýylynyń ashanasyna jetkizilip, ystyq tamaq, shaı berildi. Medıtsınalyq kómek qajet bolmady.
