SQO-da jaı túsý jaǵdaılary jıiledi
PETROPAVL. KAZINFORM – Soltústik Qazaqstan oblysynda jaı túsip, bir adam mert boldy jáne turǵyn úı órtendi.
Bul eki oqıǵa bir apta ishinde bolǵan.
SQO Tótenshe jaǵdaılar departamenti baspasóz qyzmetiniń málimetinshe, Taıynsha aýdany Krasnokamenka aýylyndaǵy jeke turǵyn úıdiń shatyryna jaı túsip, órt shyqty. Saldarynan qonaq bólmedegi kerme tóbe men jıhaz janǵan.
Oqıǵa ornyna órt sóndirýshiler jetip, jalyndy sóndirip aldy. Jaraqat alǵandar joq.
Ekinshi oqıǵa Mamlıýt aýdanynda boldy.
SQO Polıtsııa departamenti baspasóz qyzmetiniń málimetinshe, Vladımırovka eldi mekeniniń mańynda mal baǵyp júrgen baqtashyǵa jaı túsken. Qyzylásker aýylynyń 38 jastaǵy turǵynyn aman alyp qalý múmkin bolmady. Qazir osy derekke baılanysty qylmystyq is qozǵalyp, polıtsııa tergeý júrgizip jatyr.
Mamandar aýa raıy buzylyp, naızaǵaı oınaǵanda abaı bolýdy eske salady.
Buǵan deıin Aqmola oblysynda ákesi men balasyna naızaǵaı túsip, mert bolǵanyn jazǵan edik.
