SQO-da jasóspirimder arasyndaǵy qylmys 41 paıyzǵa ósken
PETROPAVL. KAZINFORM — Soltústik Qazaqstan oblysynda jyl basynan beri jasóspirimder arasynda 26 qylmys tirkeldi.
SQO polıtsııa departamentiniń bastyǵy Rýslan Nazarovtyń aıtýynsha, budan bólek jasóspirimderge qatysty qylmystyń 48 faktisi tirkelip, onyń sany 2% artyp otyr.
— Mektep aýmaǵynda bıyl qylmys jasalǵan joq, biraq ruqsat etilmegen zattardy ótkizý derekteri tirkeldi. Máselen, jyldyń basynda Petropavldaǵy № 1 orta mektep oqýshysy synypqa pnevmatıkalyq pıstolet ákelip, edenge atqan. Sergeevka qalasynda E.Shaıkın atyndaǵy mektep-lıtseıdiń burynǵy oqýshysy bilim ordasyna pyshaq alyp ótti, — deıdi Rýslan Nazarov.
Osyǵan oraı polıtsııa bastyǵy óńirde Jetisý oblysynyń tájirıbesine súıenip, mentor-tálimgerler ınstıtýtyn engizýdi usynyp otyr.
— Quqyqtyq mentorlar balalarǵa quqyqtyq keńes beredi, oqýshylarǵa durys jol kórsetip, zańdy qurmetteýge, óz isine jaýapkershilikpen qaraýǵa úıretedi, — deıdi Rýslan Nazarov.
Bıyl SQO-da jańa oqý jylynda 439 mektep jumysqa kirisedi. Onyń 285-i — terrorıstik turǵydan osal nysandar tizimine engen. Bul bilim ordalaryndaǵy barlyq beınekameralar Jedel basqarý ortalyǵyna qosylǵan. Jalpy mektepter tıisti dabyl túımelerimen de, kúzetshilermen de tolyq qamtylǵan.
Buǵan deıin Tarazda jasóspirimder qaýipsizdigine arnalǵan Aimap Kids jobasy iske qosylǵanyn jazǵan edik.
