SQO-da jasóspirimderdiń motıvatsııalyq kitaptarǵa suranysy joǵary
PETROPAVL. QazAqparat – Soltústik Qazaqstan oblysynda balalar men jasóspirimder arasynda kitap oqýǵa betburys bar, kitaphanalardaǵy arnaıy jobalar nátıjesin berip, oqyrmandar sany artyp keledi, dep habarlaıdy QazAqparat tilshisi.
SQO-daǵy Ǵabıt Músirepov atyndaǵy balalar-jasóspirimder kitaphanasyna keletinderdiń eń kishisi 3-4-tegi balaqaı bolsa, turaqty oqyrmandardyń ishinde egde jastaǵy adamdar da barshylyq. 1963 jyly negizi qalanǵan mekemeniń qorynda búginde 212 myńnan astam kitap bar. Onyń 28 myńǵa jýyǵy qazaq tilindegi ádebıet.
«Byltyr memlekettik tapsyryspen 833 dana kitap tústi. Jylda myńnan astam merzimdi basylymǵa jazylamyz. Jergilikti bıýdjetten 1 mln-ǵa jýyq teńge bólinip, oǵan oqyrmandarymyzdyń suranysy boıynsha kitaptar satyp aldyq», - deıdi kitaphananyń ádiskeri Maıra Maqysheva.
Kitaphananyń oqyrmandar sany búginde 16 myńǵa jýyqtaǵan. Bul – jaqsy kórsetkish. Maıra Maqyshevanyń aıtýynsha, bir kitaphanashy talap boıynsha 750 oqyrmanǵa qyzmet kórsetýi tıis bolsa, munda ár kitaphanashyǵa keletin adam sany myńnan asyp ketken. Onyń bári oqyrman tartý boıynsha atqarylyp jatqan jumystardyń nátıjesi.
«Byltyr kitaphanada 209 is-shara uıymdastyrylyp, oǵan 12 myńnan astam adam qatysty. Túrli taqyrypta, tanymal adamdarmen kezdesýler ótkizip turamyz. Byltyr «Qareket» qorymen ortaq jobany júzege asyrdyq. Bir kitapty tańdap alyp, oqýshylar arasynda baıqaý ótkizdik. Balalar mazmunyn aıtýdan, shyǵarma jazýdan jarysty. Aqshalaı syıaqymen marapattadyq. Bıyl da jalǵasady degen úmittemiz», - deıdi Maıra Maqysheva.
Kitaphanaǵa keletinderdiń negizgi bóligin orta býyn jáne joǵary synyp oqýshylary quraıdy. Bastaýysh synyp oqýshylary ádettegideı ertegilerdi tańdasa, jasóspirimderdiń suranysy ózgergen.
«Jasóspirimder sheteldik jazýshylardyń shyǵarmalaryna basymdyq beredi. Komıksterdi, qorqynysh týyratyn shyǵarmalardy, kórkem ádebıette fantastıkany tańdaıdy. Sońǵy kezde joǵary synyp oqýshylary arasynda motıvatsııalyq ádebıetti oqý sánge aınalǵan. Sonyń ishinde Konor Makgregordyń «Erejesiz ómir» atty shyǵarmasyn suraıtyndar kóp», - deıdi Maıra Maqysheva.
