SQO-da jasóspirim bala granata taýyp aldy: Turǵyndar evakýatsııalandy
PETROPAVL. QazAqparat – Soltústik Qazaqstan oblysynda 17 jastaǵy aýyl turǵyny alańqaıdan jaýyngerlik eski granatany taýyp aldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Qyzyljar aýdanyndaǵy aýyldardyń biriniń 17 jastaǵy turǵyny alańqaıdan granataǵa uqsas zat taýyp aldy. Tat basqan buıymdy kórsetý úshin ol apaıynyń úıine ákelgen. Qaýiptengen áıel birden polıtsııaǵa habar bergen.
Sokolov poselkelik polıtsııa bólimshesiniń qyzmetkerleri oqıǵa ornyn qorshaýǵa alyp, jaqyn mańdaǵy úsh úıdiń jeti turǵynyn qaýipsiz jerge kóshirdi. Oqıǵa ornyna jetken jarǵysh-tehnıkter qaýipti zatty arnaıy qalypqa saldy. Tabylǵan zat keńestik zamannan qalǵan jaıaý áskerde qoldanylatyn «ÝZRGM» tutandyrǵyshy bar «RGD» granatasy bolyp shyqty.
«Granata saraptamaǵa jiberildi, keıin arnaıy polıgonda joıylatyn bolady. Jarylǵysh zattarǵa uqsas zat tabylǵan jaǵdaıda zarıadtyń ózdiginen jarylýyn boldyrmaý úshin olardy ustaýǵa, ornynan qozǵaýǵa bolmaıtynyn eske salamyz», - deıdi Qyzyljar aýdany polıtsııa bólimi bastyǵynyń mindetin atqarýshy Nurlyjan Aqtanov.
